مکہ مکرمہ میں اسلامی وزرائے اوقاف کانفرنس کا آغاز

مکہ مکرمہ میں شاہ سلمان بن عبدالعزیز کی زیر سرپرستی وزیر اسلامی امور شیخ ڈاکٹر عبداللطیف آل الشیخ کی صدارت میں اسلامی ممالک کے وزارت اوقاف و اسلامی امور کی ایگزیکٹو کونسل کے 14 ویں اجلاس کا آغاز ہو گیا۔

سعودی خبررساں ایجنسی ’ایس پی اے‘ کے مطابق اجلاس دو دن جاری رہے گا جس میں 62 اسلامی ممالک کے وزرا، مفتیان کرام اور اسلامی تنظیموں کے سربراہ شریک ہیں۔

اجلاس میں حالیہ سیشن کے ایجنڈے کا جائزہ لیا گیا اور نویں کانفرنس کے ایجنڈے کی متفقہ طور پر منظوری دی گئی

علاوہ ازیں آئندہ (15 ویں) کانفرنس کے حوالے سے بعض تجاویز بھی زیر غورآئیں جس میں میزبان ملک کے بارے میں بھی بات چیت کی گئی۔

اس حوالے سے مراکش کے وزیر اوقاف و اسلامی امور احمد التوفیق نے آئندہ 15 ویں اجلاس کی میزبانی کے لیے پیشکش کی جسے شرکا نے قبول کیا۔

افتتاحی اجلاس میں کونسل کے کام کرنے کے طریقے پر تبادلہ خیال کیا گیا

اسلامی امور کی ضروریات اور نئے مسائل کے حل کے لیے پیش کی جانے والی تجاویز اور آرا پر بھی غور کیا گیا۔

واضح رہے اسلامی ممالک کے وزرات اوقاف کی ایگزیکٹو کونسل کے اس وقت 8 ممالک رکن ہیں جن میں سعودی عرب، اردن، انڈونیشیا، پاکستان ، جمہوریہ گیمبیا ، کویت ، مصر اور جمہوریہ مراکش شامل ہیں۔

ایگزیکیٹو کونسل جنرل کانفرنس کے فیصلوں پرعمل درآمد کرنے اور اس حوالے سے ضروری فیصلے و سفارشات جاری کرنے کے علاوہ کانفرنس کے لیے ایجنڈے کی تیاری اور دیگر امور کے لیے مخصوص ہے۔

 وزیر اسلامی امور نے ڈاکٹر عبداللطیف آل الشیخ نے اپنے خطاب میں کہا ’اس میں شک نہیں کہ مملکت، دہشتگردی کے خطرات کا سامنا کرنے والے اولین ممالک میں شامل ہے‘۔

انہوں نے مزید کہا’ دہشتگردی کی کارروائیوں سے نمٹنے کے لیے مملکت وسیع تجربہ رکھتی ہے اس حوالے سے اسلامی امور کے زیر سایہ مملکت نے دہشتگردی سے نمٹنے کے لیے مقامی اور عالمی سطح پر متعدد کانفرنسز اور سیمنارز کا انعقاد کرایا اور اس نوعیت کی کانفرنسوں میں شرکت کی‘۔

وزارئے اوقاف و اسلامی امور کی نویں کانفرنس کا عنوان ’اعتدال کے اصولوں کو فروغ دینے اور میانہ روی کی اقدار کو پروان چڑھانے میں اسلامی امور و اوقاف کی وزارتوں کا کردار‘ ہے جس کا مقصد مسلمانوں کے اتحاد کو عملی شکل میں لانے اور مشترکہ تعاون وشراکت داری کو فروغ دینا ہے۔