انڈین پھول فروش کا بیٹا جس نے بھوک ہڑتال کر کے آئی فون خریدا

انڈیا میں ایک عجیب و غریب واقعہ پیش آیا ہے جہاں پھول فروش خاتون کے بیٹے نے بھوک ہڑتال کر کے آئی فون خرید لیا۔

این ڈی ٹی وی کے مطابق سوشل میڈیا پر وائرل ہونے والے ویڈیو کلپ میں لڑکے کو موبائل سٹور سے آئی فون خریدتے ہوئے دیکھا جا سکتا ہے۔

اس دوران دکاندار کی جانب سے لڑکے سے آئی فون کے متعلق پوچھا گیا جس پر اُس کی والدہ نے بھی گفتگو کی۔

والدہ نے بتایا کہ اُن کا بیٹا آئی فون خریدنے کے لیے تین دنوں تک بھوک ہڑتال کرتا رہا۔

وہ کہتی ہیں کہ ’میں مندر کے باہر پھول بیچتی ہوں اور میرے بیٹے سے پچھلے تین دنوں سے کچھ نہیں کھایا کیونکہ وہ اپنے لیے آئی فون خریدنا چاہتا تھا۔‘

خاتون نے مزید بتایا کہ اس نے اپنے بیٹے کی ڈیمانڈ کو مانتے ہوئے پیسے بھی دیے تاہم اس نے آئی فون کے لیے پیسے دینے پر ایک شرط رکھ لی۔

خاتون نے اس شرط پر اپنے بیٹے کو پیسے دیے کے وہ آئی فون کی قیمت جتنے پیسے کما کر اپنی والدہ کو واپس کرے گا۔

خاتون نے کہا کہ ’میں خوش ہوں لیکن میں چاہتی ہوں کہ یہ پیسے کمائے اور مجھے واپس کرے۔‘

سماجی رابطوں کی ویب سائٹ ایکس پر صارف انگوگنیٹو نے اپنی پوسٹ میں ویڈیو اپلوڈ کی اور لکھا کہ ’ضرورت سے زیادہ پیار ہمیشہ اولاد کو خراب کرتا ہے۔ والدین کو پتا ہونا چاہیے کہ حد کہاں لگانی ہے۔‘
 

اس پوسٹ کے جواب میں صارف شِلپا نے لکھا کہ ’مجھے اس کی والدہ پر ترس آ رہا ہے۔ اسے (بیٹے کو) اس بات کا احساس تک نہیں ہے کہ اتنے پیسے کمانے کے لیے اس کی والدہ نے کتنی محنت کی ہوگی۔‘
 

سگاس کو بھارت نامی ہینڈل نے لکھا کہ ’اسے جوتے پڑنے کی ضرورت ہے۔‘
 

آریان لکھتے ہیں کہ ’والدہ کے لیے دکھ ہو رہا ہے۔ اُن نے تاثرات سب کچھ بتا رہے ہیں۔‘