روس: مشرق بعید میں ہیلی کاپٹر حادثے میں 22 افراد ہلاک
روسی ساختہ Mi-8T فوجی ہیلی کاپٹر نقل و حمل کے لیے استعمال ہوتا ہے۔ فائل فوٹو اے ایف پی
روس کے انتہائی مشرقی جزیرہ نما علاقے کامچیٹکا میں گر کر تباہ ہونے والے ہیلی کاپٹر کے ملبے میں سے کوئی زندہ نہیں بچ سکا، سوار افراد میں زیادہ تر سیاح تھے۔
روئٹرز نیوز ایجنسی کے مطابق روس کی سرکاری نیوز ایجنسی تاس نے واضح کیا ہے کہ بدقسمت ہیلی کاپٹر گذشتہ روز لاپتہ ہو گیا تھا جس میں عملے کے 3 ارکان سمیت 22 افراد سوار تھے۔
روسی ساختہ Mi-8T فوجی ہیلی کاپٹر ہے جو اندرون ملک نقل و حمل کے لیے بڑے پیمانے پر استعمال ہوتا ہے۔
ہیلی کاپٹر نے قدیم آتش فشاں پہاڑی علاقے وچکازیٹز کے قریب ایک فوجی اڈے سے اڑان بھری تھی جس کے بعد عملے سے رابطہ منقطع ہو گیا تھا، ریسکیو ٹیمیں رات بھر تلاش جاری رکھے ہوئے تھیں۔
گمشدہ ہیلی کاپٹر ماسکو سے تقریباً 7100 کلومیٹر مشرق بعید میں واقعہ جزیرہ نما علاقے کامچیٹکا میں گذشتہ روز سنیچر کو تیز ہواؤں اور بارش کے ساتھ آنے والے طوفان کی زد میں آ گیا تھا لیکن حادثے کی اصل وجہ کے بارے میں معلومات حاصل نہیں ہو سکیں۔
