جدہ میں سٹارث حالت میں گاڑیاں چوری کرنے والا گروہ گرفتار

جدہ پولیس نے کار چور گروہ گرفتار کیا ہے جس  نے سٹارٹ حالت میں 5 گاڑیاں چوری کی ہیں۔

سبق ویب سائٹ کے مطابق پولیس نے کہا ہے کہ ’گروہ میں تین افراد ہیں جن میں دو شہری جبکہ تیسرا چاڈ سے تعلق رکھنے والا تارک ہے‘۔

’گروہ کے افراد ان لوگوں کی گاڑیاں چوری کیا کرتے تھے جو گاڑی کو سٹارٹ حالت میں چھوڑ کر جاتے تھے‘۔

’متعدد افراد سے شکایات موصول ہونے پر جب تفتیش کی گئی تو معلوم ہوا کہ تمام گاڑیاں ایک ہی جغرافیائی رقبے کے اندر ایک ہی طریقے سے چوری ہوئی ہیں‘۔

’اس سے اندازہ ہوا کہ ان تمام گاڑیوں کی چوری میں ایک ہی گروہ ملوث ہے جس کی تلاش کے لیے خصوصی ٹیم تشکیل دی گئی‘۔

پولیس نے کہا ہے کہ ’بالآخر ٹیم نے چور گروہ کو گرفتار کرلیا اور چوری کی جانے والی 5 گاڑیاں ضبط کرکے مالکان کو واپس کردیں‘۔