شیخ حسینہ کے احکامات پر حامیوں کا احتجاج، ٹرمپ کے پلےکارڈز اٹھائے مظاہرین گرفتار
شیخ حسینہ کے احکامات پر حامیوں کا احتجاج، ٹرمپ کے پلےکارڈز اٹھائے مظاہرین گرفتار
اتوار 10 نومبر 2024 16:43
پولیس کے مطابق شیخ حسینہ نے حامیوں کو مظاہرہ کرنے کی ہدایت کی تھی۔ فائل فوٹو: اے ایف پی
بنگلہ دیش کی سابق وزیراعظم شیخ حسینہ کے احکامات پر امریکی نومنتخب صدر ڈونلڈ ٹرمپ کے پلے کارڈز کے ساتھ ڈھاکہ میں مظاہرہ کرنے والے حامیوں کو پولیس نے گرفتار کر لیا۔
خبر رساں ادارے اے ایف پی کے مطابق پولیس نے دس مظاہرین کو گرفتار کیا اور ’سازشی‘ قرار دیتے ہوئے ان پر ملک کو غیرمستحکم کرنے کا الزام عائد کیا ہے۔
ڈھاکہ میٹروپولیٹن پولیس کے ترجمان محمد طالب الرحمان کا کہنا ہے کہ مظاہرین کے خلاف مقدمات درج کرنے کی غرض سے ان پر لگائے گئے الزامات کا جائزہ لے رہے ہیں۔
اتوار کو عوامی لیگ کی کال پر شیخ حسینہ کے چند حامی ہی مظاہرے میں شریک ہوئے جبکہ اس دوران طلبا مظاہرین کے ساتھ تصادم بھی ہوا۔
شیخ حسینہ کی سیاسی جماعت عوامی لیگ نے بھی ریلی نکالنے کی تجویز پیش کر رکھی تھی تاہم حکومت نے جماعت کو فاشسٹ قرار دیتے ہوئے ریلی کی اجازت نہیں دی تھی۔ تاہم ریلی سے پہلے ہی سابق وزیراعظم کے چند حامی اتوار کو سڑکوں پر نکل آئے۔
خیال رہے کہ کئی ہفتے جاری رہنے والے حکومت مخالف مظاہروں کے نتیجے میں 5 اگست کو شیخ حسینہ ہیلی کاپٹر کے ذریعے انڈیا فرار ہو گئی تھیں جس کے بعد نوبل امن انعام جیتنے والے محمد یونس کی قیادت میں نگراں حکومت قائم کی گئی جس پر جمہوری اصلاحات اور عام انتخابات کروانے کی ذمہ داری سونپی گئی ہے۔
شیخ حسینہ کی حکومت کے خاتمے کے بعد ان کے متعدد حامیوں کو گرفتار کیا گیا تھا جبکہ پارٹی کے وفادار رکن روپوش ہو گئے تھے۔
پولیس کا کہنا ہے کہ شیخ حسینہ کی آڈیو ریکارڈنگ سوشل میڈیا پر گردش کر رہی ہے جس میں انہوں نے اپنے حامیوں سے ڈونلڈ ٹرمپ کی فوٹو اور امریکی جھنڈے کے ساتھ اتوار کے روز احتجاج کرنے کا کہا تھا۔
کئی ہفتے جاری رہنے والے مظاہروں کے نتیجے میں شیخ حسینہ انڈیا فرار ہو گئی تھیں۔ فائل فوٹو: اے ایف پی
پولیس نے اپنے بیان میں کہا کہ ’انہوں (شیخ حسینہ) نے پلے کارڈز کو بطور ڈھال استعمال کرنے کا کہا اور حملے کی صورت میں تصاویر لینے اور ویڈیو بنانے کا کہا۔‘
پولیس کا کہنا ہے کہ ’وہ امریکہ کے ساتھ دوستانہ تعلقات کو نقصان پہنچانے کے لیے سازش کی منصوبہ بندی کر رہے ہیں۔‘
پولیس کے مطابق عوامی لیگ نے ریلی منعقد کرنے کی اجازت نہیں لی تھی جبکہ قائم مقام وزیراعظم محمد یونس کے پریس سیکریٹری کا کہنا ہے کہ جماعت کو ریلی نکالنے کی اجازت نہیں دی گئی ہے۔
پریس سیکریٹری شفیق عالم نے جاری بیان میں لکھا ’عوامی لیگ اپنی موجودہ شکل میں ایک فاشسٹ جماعت ہے۔ جو کوئی بھی اجتماعی قاتل اور آمر شیخ حسینہ کے حکم کے تحت جلسے، اجتماعات یا جلوس نکالنے کی کوشش کرے گا اسے قانون نافذ کرنے والے اداروں کی پوری طاقت کا سامنا کرنا پڑے گا۔‘
عوامی لیگ بغیر کسی ثبوت کے صدر جو بائیڈن کی حکومت پر شیخ حسینہ کے خلاف مظاہروں کی حوصلہ افزائی کرنے کا الزام عائد کرتی آئی ہے۔
شیخ حسینہ کا 15 سالہ دور حکومت ایسے متعدد واقعات سے داغ دار ہے جب اپوزیشن جماعتوں کو اپنا جمہوری حق استعمال کرنے سے روکا گیا۔
