جی 20 سربراہی اجلاس: سعودی عرب کا عالمی چیلنجوں سے نمٹنے اور قیامِ امن کا مطالبہ
جی 20 سربراہی اجلاس: سعودی عرب کا عالمی چیلنجوں سے نمٹنے اور قیامِ امن کا مطالبہ
پیر 18 نومبر 2024 21:31
سعودی وفد میں وزیرخزانہ محمد عبداللہ الجدعان بھی شامل ہیں(فوٹو ، ایس پی اے)
سعودی ولی عہد اور وزیر اعظم شہزادہ محمد بن سلمان کی نیابت کرتے ہوئے وزیر خارجہ شہزادہ فیصل بن فرحان نے ریو کانفرنس کے افتتاحی اجلاس سے خطاب کرتے ہوئے کہا ’دنیا کو تناؤ، عسکری تنازعات اور انسانی بحرانوں کا سامنا ہے جو دنیا کی پائیدار ترقی میں رکاوٹ ہے۔‘
سعودی خبررساں ایجنسی ایس پی اے کے مطابق وزیر خارجہ برازیل کے شہر ریو ڈی جنیرو میں جی 20 ممالک کی کانفرنس میں سعودی وفد کی قیادت کررہے ہیں۔
اجلاس سے خطاب میں شہزادہ فیصل بن فرحان نے اس بات پر زور دیتے ہوئے کہا کہ ’غزہ اور لبنان میں جاری اسرائیلی جارحیت نے انسانی تکالیف اور مسائل میں بے حد اضافہ کیا اورخطے کو ایک بڑی جنگ کے دھانے پرپہنچا دیا جس سے عالمی قانون اور اداروں کی ساکھ کو بھی نقصان پہنچ رہا ہے۔‘
شہزادہ فیصل بن فرحان نے اپنے خطاب میں غزہ میں فوری جنگ بندی اور امدادی کارروائیوں کو محفوظ بنانے کے علاوہ یرغمالیوں کی رہائی اور 1967 کی سرحدوں کے مطابق دو ریاستی حل کے حوالے سے مملکت کے موقف کا اعادہ کیا۔
وزیرخارجہ نے سوڈان کی صورتحال پر بھی روشنی ڈالتے ہوئے کہا ’وہاں رونما ہونے والا تنازعہ ایک عظیم انسانی المیہ کا باعث بن رہا ہے خاص طورپر متاثرین کو بروقت امداد کی فراہمی میں ہونے والی رکاوٹوں کی وجہ سے بے پناہ مشکلات کا سامنا کرنا پڑتا ہے۔‘
کانفرنس میں سعودی وفد میں وزیرخزانہ محمد عبداللہ الجدعان، نائب وزیر خزانہ عبدالمحسن الخلف اور برازیل میں سعودی عرب کے سفیر ڈاکٹر فیصل بن ابراہیم غلام شریک ہیں۔
غزہ اور لبنان میں جاری اسرائیلی جارحیت سے انسانی مسائل میں اضافہ ہوا(فوٹو، ایس پی اے)
وزیرخارجہ کی سربراہی میں مملکت کا وفد متعدد سربراہی اجلاسوں میں بھی شرکت کرے گا جس میں مختلف موضوعات زیر غور آئیں گے۔
برازیل کے شہر ریو میں ہونے والی کانفرنس کا عنوان ’دنیا سے بھوک اور غربت کے خاتمے کےلیے اجتماعی کوشش‘ ہے جس کے تحت معاشروں میں غربت اور بھوک کے خاتمے اور پائیدار ترقی کے حصول کے علاوہ علاقائی حالات اور ہونے والی پیش رفت کا بھی جائزہ لیتے ہوئے مشائل کے حل بھی پیش کیے جائیں گے۔
