پاکستان بمقابلہ جنوبی افریقہ: ٹی20 سیریز کا آغاز آج سے

پاکستان کرکٹ ٹیم آج سے جنوبی افریقہ کے دورے کا آغاز کرے گی۔ 2019 کے بعد یہ پاکستان کا پہلا دورہ ہے جس میں وہ تینوں فارمیٹس میں میزبان ٹیم کا مقابلہ کرے گی۔

دورے کا آغاز ڈربن کے کنگز میڈ سٹیڈیم میں تین میچوں کی سیریز کے پہلے ٹی20 میچ سے ہوگا جو آج رات 9 بجے کھیلا جائے گا۔

اس سے قبل قومی سکواڈ نے پیر کو کنگز میڈ سٹیڈیم میں پریکٹس سیشن میں حصہ لیا۔ پاکستانی کھلاڑیوں نے بیٹنگ، بولنگ اور فیلڈنگ کی پریکٹس کی، جبکہ پاکستانی بیٹرز نے نیٹ پریکٹس میں حصہ لیا۔

پاکستان اور جنوبی افریقہ کے درمیان دوسرا اور تیسرا ٹی20 میچز سلسلہ وار 13 اور 14 دسمبر کو سپر سپورٹ پارک سنچورین اور دی وانڈررز سٹیڈیم جوہانسبرگ میں کھیلے جائیں گے۔

تین ون ڈے میچز 17، 19 اور 22 دسمبر کو شیڈول ہیں جس کے بعد سنچورین ٹیسٹ 26 دسمبر اور کیپ ٹاؤن ٹیسٹ 3 جنوری سے کھیلا جائے گا۔

پاکستان کے ٹی20 سکواڈ میں وائٹ بال کے کپتان محمد رضوان کی واپسی ہوئی ہے، جنہیں زمبابوے کی ٹی 20 سیریز کے دوران آرام دیا گیا تھا۔

بابر اعظم، نسیم شاہ اور شاہین شاہ آفریدی کی بھی زمبابوے سیریز میں شرکت نہ کرنے کے بعد جنوبی افریقہ کے خلاف ٹی20 سکواڈ میں واپسی ہوئی ہے۔

پاکستان نے جنوبی افریقہ کے خلاف آخری دو طرفہ ٹی20 سیریز ہوم گراؤنڈ پر فروری 2021 میں 1-2 سے جیتی تھی اور پھر اپریل 2021 میں جنوبی افریقہ میں 1-3 سے شکست دی تھی۔

جنوبی افریقہ کی قیادت ریگولر کپتان ایڈن مارکرم کی جگہ  ہینرک کلاسن کریں گے۔

کپتان محمد رضوان کا کہنا ہے کہ ’ہم پچھلے مہینے سے مصروف ہیں اور یہ ہمارا لگاتار تیسرا بیرون ملک دورہ ہے، جس نے یونٹ کو تیاریوں کے لحاظ سے اور جلد از جلد مقامی حالات کا عادی بنا دیا ہے۔ بابر، نسیم اور شاہین کی وائٹ بال سکواڈ میں واپسی ٹیم کے لیے ایک خوش آئند پیش رفت ہے اور نوجوانوں اور تجربے کے عمدہ امتزاج کے ساتھ ہم اس ٹی20 سیریز میں جنوبی افریقہ کو چیلنج کرنے کے منتظر ہیں۔‘

محمد رضوان مزید کہتے ہیں کہ ’جنوبی افریقہ کی کنڈیشنز بھی بولنگ اٹیک کو سپورٹ کریں گی اور ہم زمبابوے کے خلاف آخری دورے سے جیت کے تسلسل کو جاری رکھنے کے لیے بے چین ہیں۔‘

پاکستان ٹی20 سکواڈ:

محمد رضوان (کپتان اور وکٹ کیپر ) ابرار احمد، بابر اعظم، حارث رؤف، جہانداد خان، محمد عباس آفریدی، محمد حسنین، محمد عرفان خان، عمیر بن یوسف، صائم ایوب، سلمان علی آغا، شاہین شاہ آفریدی، سفیان مقیم، طیب طاہر اور عثمان خان ( وکٹ کیپر ) پاکستان کے سکواڈ میں شامل ہیں۔

جنوبی افریقہ  سکواڈ:

ہینرک کلاسن (کپتان) اوٹنیل بارٹمین، میتھیو بریزک، ڈونووان فریرا، ریزا ہینڈرکس، پیٹرک کروگر، جارج لینڈے، کےوینا مافاکا، ڈیوڈ ملر، اینریچ نوکیا، این قابا پیٹر، رائن ریکیلٹن، تبریزشمسی، اینڈیل سائملین، اور راسی وان ڈر ڈوسن جنوبی افریقہ کے سکواڈ کا حصہ ہیں۔

میچوں کا شیڈول:

پاکستان اور جنوبی افریقہ کے درمیان پہلا ٹی20 میچ آج کنگز میڈ سٹیڈیم، ڈربن میں کھیلا جائے گا جس کی شروعات پاکستانی وقت کے مطابق رات نو بجے ہو گی۔

پاکستان اور جنوبی افریقہ کے درمیان دورسرا ٹی20 میچ سپر سپورٹ پارک سنچورین میں 13 دسمبر کوجبکہ  تیسرا ٹی20 میچ 14 دسمبر کو دی وانڈررز سٹیڈیم، جوہانسبرگ میں کھیلا جائے گا۔

پاکستان اور جنوبی افریقہ کے درمیان پہلا ون ڈے 17 دسمبر کو بولینڈ بینک پارک، پارل میں پاکستانی وقت کے مطابق شام 5 بجے کھیلا جائے گا جبکہ دوسرا ون ڈے  نیو لینڈز کیپ ٹاؤن 19 دسمبر کو کیپ ٹاؤن اور تیسرا ونڈے 22 دسمبر کو وانڈررز سٹیڈیم، جوہانسبرگ میں کھیلا جائے گا۔

پاکستان اور جنوبی افریقہ کے درمیان پہلا ٹیسٹ 22 دسمبر، دوسرا 26 دسمبر جبکہ تیسرا تین جنوری کو شیڈول ہے۔