کارکنوں کو میڈیکل انشورنس کی عدم فراہمی پر آجروں کے خلاف کارروائی ہوگی

سعودی عرب میں انشورنس کونسل نے کارکنوں اور ان کے اہل خانہ کی لازمی میڈیکل انشورنس ضوابط پر عمل نہ کرانے والے آجروں کے خلاف کارروائی کا عندیہ دیا ہے۔

کونسل کا کہنا ہے کہ ’قانون کی شق نمبر 14 کے تحت آجر اس بات کا پابند ہے کہ وہ اپنے کارکنوں اور ان کے اہل خانہ جو کارکن کی زیر کفالت ہیں کو طبی بیمہ کی سہولت فراہم کریں۔‘

اخبار 24 کے مطابق کونسل کا مزید کہنا ہے کہ ’قانونی تقاضوں کو پورا کرتے ہوئے آجروں کو اس بات کا پابند کیا گیا تھا کہ وہ اپنے کارکنوں اور ان کے اہل خانہ کو لازمی میڈیکل انشورنس کی سہولت فراہم کریں۔‘

ضوابط کی خلاف ورزی پر قانون کے مطابق آجر کو اس بات کا پابند کیا جائے گا کہ وہ اپنے کارکن اور ان کی زیر کفالت اہل خانہ کو میڈیکل انشورنس کی سہولت فراہم کرے، ایسا نہ کرنے کی صورت میں جرمانہ عائد کیا جائے گا۔

کونسل نے مزید کہا کہ ’انشورنس پالیسی فراہم نہ کرنے پر ہر فرد کے لیے سالانہ پالیسی پریمیئم کے حساب سے جرمانہ عائد کیا جائے گا۔‘

علاوہ ازیں ایسے اداروں کے لیے ویزوں کا اجرا بھی عارضی یا دائمی طور پر روک دیا جائے گا۔

علاوہ ازیں کونسل کی ترجمان برائے میڈیکل انشورنس ایمان الطریقی کا کہنا ہے کہ ’میڈیکل انشورنس پالیسی کا حصول کارکنوں کا حق ہے اور ان کے حقوق کے تحفظ کے لیے کونسل کی جانب سے آجروں کو اس بات کا پابند کیا گیا ہے کہ وہ ضوابط پر سختی سے عمل کریں۔‘