سعودی عرب میں گھریلو کارکنان کے لیے نئے ضوابط سے تنازعات کم ہوں گے

سعودی وزارت افرادی قوت کا کہنا ہے کہ گھریلو کارکنوں کے حوالے سے جاری ضوابط کا مقصد کام کے معیار کو بہتر بنانا اور فریقین کے حقوق کا تحفظ ہے۔

اخبار 24 کے مطابق وزارت افرادی قوت وسماجی بہبود آبادی نے گھریلو کارکنوں کے معاہدہِ ملازمت کو از سرنو مرتب کرتے ہوئے ان میں متعدد نکات کی وضاحت کی ہے۔

جس میں یومیہ کام کے گھنٹے اور آرام کے دورانیے کے علاوہ معاہدہ منسوخ یا ختم کرنے کے نکات بیان کیے ہیں جن کے تحت کسی بھی اختلاف پر قانونی نکات کے مطابق فیصلہ کرنا آسان ہوگا۔

ضوابط میں ان امور کی بھی نشاندہی کی گئی ہے جن پرعمل نہ کرنے کی صورت میں جرمانہ عائد کیا جاتا ہے جس کا مقصد فریقین کے حقوق کا تحفظ ہے۔

یاد رہے سعودی عرب میں مرد اور خواتین گھریلو ملازمین کی کل تعداد 3.97 ملین ہوگئی جن میں سے 2.73 ملین مرد اور 1.25 ملین خواتین شامل ہیں۔

ان میں سرونٹس، ہاوس کلینر، ڈرائیور، کک، فوڈ پرووائیڈر،  سکیورٹی گارڈز،ہوم مینجرز، ہوم گارڈنز، ٹیلر اور نجی اساتذہ شامل ہیں۔

 انسانی وسائل اور سماجی ترقی کی وزارت نے دو سال قبل ہر اضافی گھریلو ملازم کے لیے سالانہ 9 ہزار 600 ریال فیس کا نفاذ شروع کیا تھا۔ 

سعودیوں کے لیے 4 گھریلو ملازم سے زیادہ اور غیرملکیوں کے لیے 2 ملازم سے زیادہ پر فیس لاگو کی گئی۔