پانی ضائع کرنے والوں کے خلاف کارروائی، راولپنڈی میں شہریوں پر دس، دس ہزار روپے جرمانہ

پانی کو ضائع ہونے سے بچانے کے لیے پنجاب حکومت کے احکامات پر عمل درآمد شروع ہو گیا ہے۔ راولپنڈی میں واسا نے احکامات کی خلاف ورزی کرنے پر دو شہریوں پر 10، 10 ہزار جرمانے عائد کیے ہیں۔

ایم ڈی واسا سلیم اشرف کی جانب سے جاری ایڈوائزری میں کہا گیا ہے کہ واسا نے پانی کے ذخائر میں کمی پر پانی کے استعمال میں احتیاط برتنے کے لیے واٹر ایمرجنسی نافذ کر دی ہے۔

انہوں نے کہا کہ خشک سالی کے باعث راولپنڈی میں پانی کا بحران شدت اختیار کرگیا ہے۔ فروری اور مارچ میں بارشیں نہ ہوئی تو پانی کا مسئلہ سنگین ہوگا۔ محکمہ موسمیات نے بھی قلیل بارشوں کی پیش گوئی کی ہے۔

ایم ڈی واسا کے مطابق آبادی میں مسلسل اضافہ اور کمرشل سرگرمیوں سے پانی کے ذخائر میں کمی ہو رہی ہے۔ ’شہر میں پانی کی یومیہ طلب 68 ملین گیلن ہے جبکہ دستیاب پانی صرف 51 ملین گیلن یومیہ ہے۔‘

انہوں نے بتایا کہ زیر زمین پانی کا لیول 700 فٹ نیچے چلا گیا ہے۔ پانی کی ضرورت راول ڈیم، خان پور ڈیم اور ٹیوب ویلز سے پوری کی جا رہی ہے۔ 

ایم ڈی واسا کا کہنا تھا کہ ’پانی کے غیر ضروری استعمال پر مقدمات درج کریں گے۔ پانی ضائع کرنے پر دو شہریوں پر چالان کیے ہیں۔‘

انہوں نے مزید بتایا کہ خان پور ڈیم کی بھل صفائی کے باعث 22 فروری تک پانی کی سپلائی معطل رہے گی۔ واسا سی ڈی اے کنٹونمنٹ بورڈ مشترکہ طور پر بھاری مشینوں کے ذریعے  بھل صفائی کررہے ہیں۔

انہوں نے شہریوں سے پانی کا استعمال کم کرنے اور واسا کے ساتھ تعاون کرنے کی اپیل کی۔

پنجاب حکومت نے گھروں میں گاڑی دھونے پر بھی پابندی عائد کرتے ہوئےخبردار کیا تھا کہ خلاف ورزی کرنے والے پر 10 ہزار روپے کا جُرمانہ ہو گا۔

صوبائی حکومت نے تعمیراتی مقامات پر بھی زمینی پانی کے استعمال پر پابندی عائد کی ہے۔

صوبہ پنجاب کے محکمہ موحولیات نے بارشوں کی کمی کے باعث پانی کی قلت کا خدشہ ظاہر کیا تھا اور صورتحال کے پیش نظر صوبے میں غیرقانونی اور غیرمنظور شدہ کار واش و سروس اسٹیشنوں کی فوری بندش کے احکامات جاری کیے۔

محکمے نے ہدایت کی  کہ تمام کار واش سٹیشنوں پر 28 فروری 2025 تک واٹر ری سائیکلنگ سسٹم اور یو چینلز کی تنصیب لازمی ہونی چاہیے اور خلاف ورزی پر 1 لاکھ روپے جرمانہ اور کار واش ایریا سیل کیا جائے گا۔