شہزادہ محمد بن سلمان مجھ سے زیادہ کامیاب ہیں : بورس جانسن

سابق برطانوی وزیر اعظم بورس جانسن نے سعودی عوام  کو مخاطب کرتے ہوئے کہا ہے کہ اپنے ملک کی کامیابیوں پر فخر کریں۔

سبق ویب سائٹ کے مطابق سعودی میڈیا فورم 2025 سے خطاب کرتے ہوئے انہوں نے کہا ہے کہ ’ولی عہد شہزادہ محمد بن سلمان نے سیاسی طور پر مجھ سے زیادہ کامیابی حاصل کی ہے اور آپ ان کے جیسے بہادر رہنما پر خوش قسمت ہیں‘۔

انہوں نے کہا ہے کہ ’میں ولی عہد کو کوئی مشورہ دینے میں ہچکچاہٹ محسوس کرتا ہوں کیونکہ وہ سیاسی طور پر مجھ سے زیادہ کامیاب ہیں، میں صرف اتنا کہوں گا کہ اپنی شاندار بہادری کا اظہار جاری رکھیں‘۔

واضح رہے کہ آج وزیر اطلاعات سلمان بن یوسف الدوسری کی سرپرستی میں ’سعودی میڈیا فورم 2025‘ کے چوتھے ایڈیشن کا آغاز ہوا۔

 یہ فورم 19 سے 21 فروری 2025 تک ریاض میں ’ترقی پذیر دنیا میں میڈیا‘ کے عنوان کے تحت منعقد ہو رہا ہے جس میں مقامی اور بین الاقوامی سطح پر 200 ممتاز میڈیا شخصیات، ماہرین تعلیم اور وزراء، سرکاری اداروں کے حکام، اکیڈمک اداروں کے نمائندے، میڈیا کے شعبے میں فیصلہ ساز اور سرمایہ کار شریک ہیں۔