سال کی سخت ترین سرد لہر آج اور کل، وسیع رقبہ متاثر ہوگا

سعودی ماہر موسمیات عبد اللہ العصیمی نے کہا ہے کہ سعودی عرب میں سال رواں کی سخت ترین سرد لہر آج منگل اور کل بدھ کو ہوگی۔

سبق ویب سائٹ کے مطابق انہوں نے کہا ہے کہ ’موسمی نقشوں کا مطالعہ کرنے سے معلوم ہوا ہے کہ سردی کی شدید لہر سے شمالی علاقوں سمیت ملک کا وسیع رقبہ متاثر ہوگا‘۔

دوسری طرف محکمہ موسمیات کے ترجمان حسین القحطانی نے کہا ہے کہ ’آج منگل کو طرف میں منفی 5 ڈگری ریکارڈ کی گئی ہے اور یہ سال کی سب سے کم ریکارڈ شدہ درجہ حرارت ہے‘۔

انہوں نے کہا ہے کہ ’سرد لہر کی شدت کا زور جمعہ تک ٹوٹ جائے گا جس کے بعد موسم اعتدال کی طرف مائل ہونا شروع ہوگا‘۔

دوسری طرف محکمہ موسمیات نے کہا ہے کہ سعودی عرب کے بیشتر شہر سردی کی نئی لہر کی زد میں ہیں جہاں درجہ حرارت کافی کمی محسوس کی جارہی ہے۔

سبق ویب سائٹ کے مطابق محکمے نے کہا ہے کہ تبوک، حائل، الجوف اور شمالی حدود ریجن میں درجہ حرارت نقطہ انجماد تک پہنچ رہاہے جبکہ اس کی تاثیر ملک کے دیگر شہروں میں بھی محسوس کی جارہی ہے۔

دوسری طرف ماہر موسمیات عبد العزیز الحصینی نے کہا ہے کہ ’سردی کی لہر آج منگل اور کل بدھ تک جاری رہے گی‘۔

’فجر کے وقت اس کی شدت میں اضافہ ہوگا جبکہ شمالی علاقوں میں برف جم جانے کا بھی امکان ہے‘۔

انہوں نے شمالی، وسطی اور مشرقی علاقوں کے رہائشیوں کو احتیاطی تدابیر اختیار کرنے اور گرم کپڑوں کا اہتمام کرنے کا مشورہ دیتے ہوئے کہا ہے کہ ’سردی کی لہر میں اچانک کمی ہوسکتی ہے‘۔

دریں اثنا محکمہ موسمیات نے مکہ مکرمہ ریجن کے متعلق اپنی رپورٹ میں کہا ہے کہ ’جدہ، رابغ، اللیث اور خلیص میں گرد آلود تیز ہوا چلے گی‘۔

’جدہ اور رابغ کے سمندر میں تین میٹر تک بلند موجیں اٹھیں گی  اور یہ صورتحال دوپہر ایک بجے تک رہ سکتی ہے‘۔