ابوظبی کے ولی عہد کل پاکستان کا پہلا سرکاری دورہ کریں گے

وزیراعظم شہباز شریف کی دعوت پر ابوظبی کے ولی عہد شیخ خالد بن محمد بن زاید النہیان کل 27 فروری کو پاکستان کا پہلا سرکاری دورہ کریں گے، ان کے ہمراہ اعلیٰ سطح کا وفد بھی ہوگا جس میں وزرا اور اعلیٰ حکام کے علاوہ کاروباری شخصیات بھی ہوں گی۔

بدھ کو دفتر خارجہ کی جانب سے جاری پریس ریلیز کے مطابق یہ دورہ پاکستان اور متحدہ عرب امارات (یو اے ای) کے درمیان گہرے برادرانہ تعلقات کو اجاگر کرتا ہے اور دوطرفہ اقتصادی شراکت داری کو مزید مستحکم کرنے کے مشترکہ عزم کی عکاسی کرتا ہے۔ 

دورے کے دوران ولی عہد پاکستان کی قیادت کے ساتھ باہمی دلچسپی کے امور پر تبادلہ خیال، تاریخی رشتوں کو مضبوط بنانے اور اقتصادی اور سرمایہ کاری میں تعاون کو فروغ دینے کے لیے بات چیت کریں گے۔

کثیر جہتی شعبوں میں طویل مدتی تعاون کے لیے موجودہ مضبوط فریم ورک کو تقویت دینے کے لیے دورے کے دوران کئی معاہدوں اور مفاہمت کی یادداشتوں پر دستخط کیے جائیں گے۔ ان کے ذریعے دونوں ممالک اور ان کے عوام کے درمیان اقتصادی تعاون کو آگے بڑھانے کے لیے مشترکہ منصوبوں اور منصوبوں کے لیے نئے مواقع کی توقع ہے۔

مزید کہا گیا کہ پاکستان اور متحدہ عرب امارات کے درمیان ہمیشہ باہمی احترام، اعتماد اور مشترکہ خواہشات پر مبنی تعلقات رہے ہیں۔