منی بجٹ آئی ایم ایف کے کہنے پرلایا گیا؟

اسلام آباد....سابق وزیر خزانہ مفتاح اسماعیل نے وفاقی حکومت کے منی بجٹ کو آئی ایم ایف کا بجٹ قرار دے دیا۔ ٹی وی انٹرویو میں سابق وزیر خزانہ نے کہا کہ ٹیکس دینے والا طبقہ ہار گیا اور نان فائلر جیت گیا کیونکہ اب نان فائلر بھی گاڑی خرید سکتا ہے جس سے ٹیکس پیئر کا کوئی فائدہ نہیں ہوا۔اچھا ہوتا کہ نان فائلر پر عائد قدغن لگی رہنے دی جاتی۔انہوں نے کہا کہ آج ٹیکس دینے والا ہار گیا لینڈ مافیا اور آٹو مافیا جیت گیا ۔ حکومت نے نان فائلرز کو سہولت دے کر ٹیکس دینے والے کو پیچھے دھکیل دیا۔مفتاح اسماعیل نے کہا کہ ہماری حکومت نے2 لاکھ سے زائد آمدن والوں کا ٹیکس کم کیا تھا لیکن اسے پھر بڑھادیاگیا۔ حکومت نے گیس کی قیمتوں میں اضافہ کرکے عوام کو ڈیڑھ سو ارب روپے کا ٹیکہ لگایا۔ اس سے اشیائے خورونوش کی قیمتوں میں اضافہ ہوگا۔انہوں نے کہا کہ حکومت نے بینکنگ ٹرانزکشن پر ٹیکس بڑھا دیا جس سے لاکھ روپے ٹرانزکشن پر 200 روپے کٹیں گے۔یہ آئی ایم ایف کا بجٹ ہے، حکومت ا یم ایف کے پاس جانے کا فیصلہ کرلیا لیکن بتا نہیں رہے۔