قاہرہ ۔۔۔ مصر کے جنوبی علاقے میں رہنے والے 3 بھائیو ں نے اپنے متوفی والد کی قبر کھود کر نعش گھر میں دفن کر دی ۔پولیس نے ملزمان کو حراست میں لیکر ان کے خلاف مقدمہ دائر کر دیا ۔ ملزمان کو 15 روزہ تفتیشی ریمانڈ پر جیل بھجوا دیا گیا ۔ سبق نیوز نے مصری جریدے کے حوالے سے لکھا ہے کہ مصر ی صوبے صعید کے جنوبی قصبے بنی سویف میں ایک شخص کا 5 ماہ قبل انتقال ہو گیا تھا جسے حسب روایت قصبے کے قبرستان میں سپرد خاک کر دیا ۔ متوفی کے بیٹوں نے تدفین کے 5 ماہ بعد والد کی نعش کو قبرستان سے نکال کر گھر منتقل کیا اور اسے گھر کے احاطے میں دفن کر کے مزار کی تعمیر شروع کردی ۔ قصبے کے لوگوں نے واقعے کی اطلاع پولیس کو دی جس پر تینوں ملزمان کو گرفتار کر کے انکے خلاف مقدمہ درج کر لیا گیا ۔ عدالت نے قصبے کی پنچایت کو حکم دیا ہے کہ وہ نعش کو قبرستان منتقل کر نے کے لئے کارروائی شروع کرے ۔
