پاکستان کی فوج کے ترجمان نے کہا ہے کہ کنٹرول لائن پر انڈین فوج کی فائرنگ سے ایک اہلکار اور پانچ عام شہری مارے گئے ہیں جبکہ دو فوجی اہلکار اور پانچ شہری زخمی بھی ہوئے ہیں۔
انہوں نے کہا کہ انڈین فوج نے تین سیکٹرز میں سیز فائر کی خلاف ورزی کی ہے۔
آئی ایس پی آر کے ڈائریکٹر جنرل میجر جنرل آصف غفور نے ٹویٹ کرتے ہوئے بتایا ہے کہ ’انڈین فوج نے جوڑا، شاہ کوٹ اور نوسہری سیکٹر میں بلا اشتعال فائرنگ کی اور شہری آبادی کو نشانہ بنایا۔‘
فوجی ترجمان نے دعویٰ کیا کہ جوابی کارروائی میں نو انڈین فوجی ہلاک اور متعدد زخمی ہو گئے۔ انہوں نے انڈین فوج کے دو بنکرز تباہ کرنے کا بھی دعویٰ کیا ہے۔
Indian unprovoked CFVs in Jura, shahkot & Nousehri Sectors deliberately targeting civilians. Effectively responded. 9 Indian soldiers killed several injured. 2 Indian bunkers destroyed.
During exchange of fire 1 soldier & 3 civilians shaheed, 2 soldiers & 5 civilians injured.— DG ISPR (@OfficialDGISPR) October 20, 2019
میجر جنرل آصف غفور نے ایک اور ٹویٹ میں بتایا کہ انڈیا کی فائرنگ سے زخمی ہونے والے دو سویلین زخموں کی تاب نہ لاتے ہوئے چل بسے۔ ان کا کہنا ہے کہ انڈین فائرنگ سے کل پانچ سویلین ہلاک ہو گئے۔
ڈی جی آئی ایس پی آر کے مطابق پاکستان آرمی کی جانب سے موثر کارروائی کے بعد انڈیا کی بندوقیں خاموش ہوگئیں اور اب وہ لاشوں اور زخمیوں کو نکال رہے ہیں۔
Two more civilian casualties succumbed to injuries. Total 5 civilians Shaheed. Indian guns silent as of now to undertake evacuation of their dead and injured after effective and befitting response from Pakistan Army.
— DG ISPR (@OfficialDGISPR) 20 October 2019
ایک اور ٹویٹ میں میجر جنرل آصف غفور نے کہا کہ انڈین میڈیا ’آزاد کشمیر‘ میں مبینہ کیمپوں کو ٹارگٹ کرنے کا جھوٹا دعویٰ کر رہا ہے۔ انہوں نے کہا کہ ’انڈین میڈیا اخلاقی جرآت کا مظاہرہ کرتے ہوئے کشمیر تک رسائی حاصل کرے اور پاکستانی فوج کی جوابی کارروائی میں ہونے والے نقصانات کو دکھائے۔‘
ڈی جی آئی ایس پی آر کے مطابق ’آپ کے سابقہ تمام دعوے جھوٹے ثابت ہوئے اور یہ بھی ہوگا۔‘
جنرل آصف غفور نے انڈین میڈیا کو مشورہ دیا کہ پاکستانی میڈیا کی طرح صحافتی اقدار کی پاسداری کرتے ہوئے ذمہ داری کے ساتھ رپورٹنگ کریں۔
ڈی جی آئی ایس پی آر نے ٹوئٹر پر ایک اور بیان میں کہا ’پاکستان کے زیر کنٹرول کشمیر میں تین مبینہ کیمپوں کو تباہ کرنےکے دعوے سے متعلق انڈین آرمی چیف کابیان مایوس کن ہے کیونکہ وہ انتہائی ذمہ دار عہدے پر ہیں‘۔
’یہاں کوئی کیمپ ہی نہیں نشانہ بنانا تو دور کی بات ہے۔ پاکستان میں انڈین سفارتخانہ غیر ملکی سفارتکار یا میڈیا کو زمین پر ’ثبوت ‘دکھانے کے لیے لے جاسکتا ہے‘
ترجمان نے کہا ’خصوصا پلوامہ واقعہ کے بعد سے سینیئر فوجی قیادت کی جانب سے جھوٹے دعووں کا رجحان خطے میں امن کے لئے نقصان دہ ہے۔ انڈین فوج کی طرف سے اس طرح کے جھوٹے دعوے داخلی مفادات کے لیے کیے جارہے ہیں۔ یہ پیشہ ورانہ فوجی اخلا قیات کے خلاف ہے‘۔
واضح رہے کہ انڈین آرمی چیف جنرل بپن راوت نے کنٹرول لائن پر کارروائی کے دوران تین کیمپ تباہ کرنے کا دعویٰ کیا تھا۔
دوسری جانب انڈین فوج کے ترجمان کرنل راجیش کالیا نے خبر رساں ادارے اے ایف پی کو بتایا ہے کہ پاکستانی فوج کی فائرنگ سے ضلع کپواڑہ کے تنگدھار سیکٹر میں ان کے دو فوجی اور ایک عام شہری ہلاک جبکہ تین دیگر افراد زخمی بھی ہوئے ہیں۔
ان کا مزید کہنا تھا کہ فائرنگ سے متعدد گھروں کو بھی نقصان پہنچا ہے۔
اے ایف پی نے پاکستان کے زیر انتظام کشمیر کے حکام کے حوالے سے کہا ہے کہ مظفر آباد اور وادی نیلم میں چھ عام شہری ہلاک جبکہ آٹھ زخمی بھی ہوئے۔
مظفر آباد کے ڈپٹی کمشنر بدر منیر نے اے ایف پی کو بتایا ہے کہ مارٹر گولے شہری آبادی پر گرے ہیں۔ ان کا کہنا تھا کہ مرنے والوں میں ایک خاندان کے تین افراد بھی شامل ہیں۔
ادھر وزیراعظم پاکستان عمران خان نے ’شہری آبادی پر انڈین فورسسز کی بلااشتعال فائرنگ‘ کی مذمت کرتے ہوئے کہا ہے کہ وہ زخمیوں کی جلد صحت یابی کے لیے دعاگو ہیں۔
