لبنانی گلوکارہ نینسی عجرم کے گھر گھسنے والا چور فائرنگ سے ہلاک

معروف لبنانی گلوکارہ نینسی عجرم کے بنگلے میں چوری کی واردات کرنے والے کو مہنگا پڑ گیا۔ نقاب پوش چور جونہی بنگلے میں داخل ہوا اس کا سامنا نینسی عجرم کے شوہر  سے پڑ گیا۔  

اس نے پستول چلانے کی دھمکی دی۔ دونوں میں فائرنگ کا تبادلہ ہوا اور بالآخر واردات کے لیے آنے والا جان سے ہاتھ دھو بیٹھا۔

سبق ویب سائٹ نے لبنانی سرکاری ایجنسی کے حوالے سے اطلاع دی ہے کہ شامی چور محمد حسن الموسیٰ اتوار کو صبح سویرے نیو سہیلہ قصروان علاقے میں واقع نینسی عجرم کے بنگلے میں چوری کی  نیت سے پہنچا تھا۔ 

اسکا سامنا نینسی عجرم کے شوہر ڈاکٹر فادی الہاشم سے ہوگیا۔ دھمکانے کے لیے اس نے پستول نکالا۔ دونوں میں فائرنگ کا تبادلہ ہوا اور چور ڈاکٹر الہاشم کے ہاتھوں ہلاک ہوگیا۔

اطلاع ملتے ہی سیکیورٹی فورسز اور فوجداری کے  شواہد جمع کرنے والے ادارے کے اہلکار جائے وقوعہ پہنچ گئے۔ واقعہ کی تحقیقات جاری ہیں۔

مزید اطلاعات کے مطابق  لبنان کے النہار اخبار نے نینسی عجرم کی تصاویر جاری کی ہیں جن میں سے ایک میں وہ زخمی نظر آرہی ہیں۔ 

لبنانی جریدے کا کہنا ہے کہ نینسی عجرم کے پیر پر پٹی بندھی ہوئی ہے۔ وہ اس وقت زخمی ہوئیں جب چور ان کی بچیوں کے بیڈ روم میں داخلے کی کوشش کررہا تھا اور اس نے فائرنگ شروع کردی جس سے نینسی عجرم زخمی ہوگئیں۔ 

سوشل میڈیا پر چوری کے لیے آنے والے شامی چور کی تصاویر وائرل ہوگئیں ہیں۔

لبنانی جریدے نے واقعہ کی تحقیقات کرنے والے ذرائع کے حوالے سے اطلاع دی ہے کہ شامی چور نے بنگلے کے تین چوکیداروں کو پستول کے بل پر بھگا دیا تھا۔

عجرم کے شوہر نے چور کو بھاگنے کے لیے رقم کی پیشکش بھی کی تھی مگر وہ کامیاب نہ ہوسکے۔

چور بچیوں کے بیڈ روم کی جانب جانے لگا اور ساتھ ہی دھمکی دے رہا تھا کہ جو بھی اس کے راستے میں آئے گا وہ اسے گولی سے اڑ دے گا۔

 جب چور نے کسی قیمت پر ان کی بات نہیں مانی تو انہوں نے فائرنگ کرکے چور کو ڈھیر کردیا۔