بالی وڈ فنکار بھی دہلی کے کشیدہ حالات پر پریشان

انڈیا کے دارالحکومت دہلی میں شہریت کے ترمیمی بل کے خلاف دو ماہ سے مظاہرے جاری ہیں جن میں اب تک 20 افراد ہلاک جبکہ سینکڑوں زخمی ہوچکے ہیں۔

اس کشیدہ صورت حال پر جہاں اپوزیشن جماعتوں کے رہنماؤں نے ردعمل کا اظہار کیا ہے وہیں بالی وڈ فنکار بھی خاموش نہ رہ سکے۔

بالی وڈ کے نامور شاعر اور نغمہ نگار جاوید اختر نے اپنے ٹوئٹر پیغام میں لکھا کہ ’دہلی میں تشدد بڑھتا جارہا ہے۔‘

انہوں نے حکمران جماعت پر تنقید کرتے ہوئے لکھا کہ ’تمام کپل مشرا (بی جے پی رہنما) کو کھلا چھوڑ دیا گیا ہے۔‘

ایسی فضا بنانے کی کوشش کی جا رہی ہے کہ جیسے یہ سب شہریت کے ترمیمی بل کے خلاف ہونے والے مظاہروں کی وجہ سے ہے اور کچھ دنوں میں دہلی پولیس اس کا حتمی حل نکال لے گی۔‘ 

بالی وڈ اداکارہ سویرا بھاسکر نے اپنی ٹویٹ میں عام آدمی پارٹی کو مخاطب کرتے ہوئے لکھا کہ ’یہ ایک ہنگامی درخواست ہے، ٹویٹ کرنے سے کچھ زیادہ کریں۔‘

اداکارہ ریچا چڈھا نے اپنی ایک ٹویٹ میں پولیس پر فائرنگ کرنے والے شاہ رخ نامی نوجوان کی تصویر شیئر کرتے ہوئے لوگوں سے ان کے حوالے سے معلومات شیئر کر کے دہلی پولیس کی مدد کرنے کی اپیل کی۔

سینیئر اداکارہ روینا ٹنڈن بھی میدان میں آگئیں اور انہوں نے بھی دہلی پولیس کے ساتھ ہمدردانہ جذبات کا اظہار کرتے ہوئے لکھا کہ ’پولیس پر کام کا دباؤ ہے اور ایک اہلکار ہلاک بھی ہوگیا ہے۔ اگر ہم اتنے رحم دل ہوسکیں کہ سوگواران کے ساتھ بھی اظہار تعزیت کرسکیں۔ ان کی زندگی اتنی آرام دہ نہیں ہوتی وہ (پولیس اہلکار) ایک ایسی ملازمت میں پھنسے ہیں جس پر انہیں کبھی سراہا نہیں جاتا۔ وہ مسلسل دباؤ میں ہیں۔‘

سونم کپور جو آج کل سوشل میڈیا پر کافی متحرک ہیں، اس معاملے پر انہوں نے بھی تشویش کا اظہار کرتے ہوئے واقعے کو خوفناک قرار دیا۔

سونم کپور نے مصطفی آباد کی کشیدہ صورت حال پر ایک ٹویٹ کے جواب میں  لکھا کہ وہ دل سے دعا گو ہیں کہ حالات ٹھیک ہوں۔