’اسی ٹڈیاں دی نسل مکا دینی اے‘

پاکستان میں حکمران جماعت تحریک انصاف کے رکن اسمبلی ریاض فتیانہ نے ٹڈیوں کے ذریعے کورونا وائرس سے بچاؤ پر گفتگو کیا کی سوشل میڈیا کو بحث کا نیا موضوع مل گیا۔

قومی اسمبلی کے اجلاس کے موقعے پر خطاب کرتے ہوئے ریاض فتیانہ نے دیگر موضوعات کے ساتھ کورونا کا بھی ذکر کیا۔

ان کا کہنا تھا کہ ’کہتے ہیں ٹڈی دل کھانے سے کورونا وائرس کا بہترین دفاع ہو سکتا ہے۔ اس کی اگر تحقیق کروا لی جائے اور یہ ثابت ہو جائے کہ ٹڈی دل کھانے سے بہترین قوت مدافعت پیدا ہوتی ہے تو پاکستانی قوم خود ہی اس کا تیا پانچا کر لے گی حکومت کو زیادہ محنت نہیں کرنی پڑے گی‘۔

ماضی میں بھی متعدد مواقع پر اپنے بیانات کی وجہ سے طنزیہ تبصروں کا سامنا کرنے والے پی ٹی آئی کے رکن اسمبلی کی گفتگو کی تفصیل پہلے تحریر اور پھر ویڈیو کی صورت میں سوشل میڈیا ٹائم لائنز پر آئی تو صارفین چند روز قبل کورونا وائرس کے متعلق وزیر مملکت زرتاج گل کے بیان سمیت ایسے ہی دیگر مواقع کو یاد کرتے رہے۔

ٹیلی ویژن میزبان سید ثمر عباس نے ’انمول ہیرے‘ کی اصطلاح استعمال کی اور لکھا کہ ’ریاض فتیانہ نے ٹڈی دل اور کورونا کا مسئلہ ہی حل کر دیا‘۔

انہوں نے وزیرصحت پنجاب یاسمین راشد کے لاہوریوں کو 'عجیب مخلوق' اور 'جاہل' کہنے کے بیان کا حوالہ دیتے ہوئے لکھا کہ ’صرف یاسمین راشد کا قصور نہیں تھا آپ لوگ واقعی اس قوم کو جاہل ہی سمجھتے ہو‘۔

ابن حوا نامی ہینڈل نے ریاض فتیانہ کے خیال سے اتفاق ظاہر کیا اور لکھا کہ ’حکومتی ارکان سے شروع کیا جانا چاہیے تا کہ مثال بنائی جا سکے‘۔

لاپرواہ نامی ہینڈل نے اسمبلی میں تقریر کے ممکنہ نتائج کو اپنے تبصرے کا حصہ بنایا تو لکھا ’کورونا ختم ہو نا ہو، اسی ٹڈیاں دی نسل مکا دینی اے‘۔

ندیم خان گفتگو کا حصہ بنے تو انہوں نے ریاض فتیانہ کی تجویز کو ’فلسفے‘ کا درجہ دیا اور ساتھ ہی قہقے لگاتے ہوئے اس پر قربان جانے کے عزم کا اظہار بھی کیا۔

افشاں مصعب نے حکومتی رکن کی تجویز پر ردعمل میں ان کے لیے اکیس توپوں کی سلامی کی سفارش کر ڈالی۔

ہسٹری بف نامی ہینڈل نے ریاض فتیانہ کی گفتگو کا جواز پیش کیا تو لکھا ’ہو سکتا ہے وہ لوگوں کو ٹڈیاں کھانے پر آمادہ کرنا چاہتے ہوں‘۔

یہ پہلا موقع نہیں کہ ریاض فتیانہ نے کورونا وائرس سے متعلق کوئی گفتگو کی ہو اور انہیں تنقید کا سامنا کرنا پڑا ہو۔ مئی میں ایک ٹیلی ویژن گفتگو کے دوران بھی پی ٹی آئی رہنما نے لاہور میں کورونا کا پھیلاؤ اپوزیشن جماعت ن لیگ کے سر ڈالا تو سوشل میڈیا صارفین نے ان پر تنقید کے نشتر برسائے تھے۔

• واٹس ایپ پر پاکستان کی خبروں کے لیے ’اردو نیوز‘ گروپ جوائن کریں