عمان نے آجروں کیلئے غیرملکی ملازمین کی فیسوں میں اضافہ کردیا
عمان نے آجروں کیلئے غیرملکی ملازمین کی فیسوں میں اضافہ کردیا
جمعرات 28 جنوری 2021 20:05
ہنرمند کارکنوں کے لئے 1561 ڈالرفیس ادا کرنی ہوگی۔(فوٹو آئی ایف پی انفو)
عمان کی وزارت محنت نے آجروں کے لئے غیر ملکی ملازمین کی فیسوں میں اضافہ کر دیا ہے۔ اس کے ساتھ ہی فیسوں کا نیا ڈھانچہ بھی جاری کیا گیاہے۔
عرب نیوز کے مطابق عمان کے ڈیلی ٹائمز نے ایک رپورٹ شائع کی ہے جس کا مقصد عمان کے شہریوں کےلیے ملازمتوں میں اضافہ کرنا ہے۔
یہ فیصلہ ’’عمانائزیشن‘‘میں بتدریج اضافہ کرنے کے لئے کیا گیا ہے۔(فوٹو الخلیج ٹوڈے)
وزارت محنت کی جانب سے واضح کیا گیا ہے کہ فیسوں کےنئے ڈھانچے میں اعلیٰ عہدوں پرغیر ممالک کے شہریوں کی خدمات حاصل کرنے کے لئے5198 ڈالر، درمیانے درجے کے عہدوں کے لئے 2600 ڈالراور تکنیکی نیز ہنرمند کارکنوں کے لئے 1561 ڈالرفیس ادا کرنی ہوگی۔
یہ فیصلہ سلطنت عمان میں مختلف ملازمتوں کے قومیانے کے پروگرام ’’عمانائزیشن‘‘میں بتدریج اضافہ کرنے کے لئے کیا گیا ہے۔
اعلیٰ عہدوں پرغیر ملکیوں کی خدمات کےلئے5198 ڈالرفیس ادا کرنی ہوگی۔(فوٹو عرب نیوز)
کچھ صنعتوں میں ہر غیر ملکی ملازم کی خدمات کے حصول کے لئے ایک مخصوص فیس ہوگی۔ ایک غیر ملکی ماہی گیر کی خدمات حاصل کرنے کے لئے کمپنیوں کوتقریباً 938 ڈالرادا کرنے ہوں گے جبکہ دوسری صنعتوں میں ہر عہدے پر غیر ملکی ملازمین کی تعداد کے لحاظ سے فیس میں اضافہ ہوگا۔
کمپنیوں کو ملازمت میں تبدیلی اور کسی بھی ملازم کی ملازمت کی حیثیت کو اپ ڈیٹ کرنے کے لئے اضافی فیس بھی ادا کرنا ہوگی تاہم سمال اینڈ میڈیم انٹرپرائزز ’’ایس ایم ایز‘‘ یعنی چھوٹے اور درمیانے درجے کے کاروباری اداروں کے مالکان کو کچھ استثنا دیا گیا ہے۔
عمان کی وزارت محنت کے مطابق یہ ان آجروں کے لئے ہے جنہیں ان کمپنیوں کو سنبھالنے کی ذمہ دارسونپی گئی ہے جوپبلک اتھارٹی فار ایس ایم ای ڈیولپمنٹ (ریادا) کے تحت رجسٹرڈ ہیں۔
عمان کی پبلک اتھارٹی فار سوشل انشورنس (پی اے ایس آئی) کے تحت اسے انشور بھی کیا گیا ہے۔
اس کے علاوہ سمال اینڈ میڈیم انٹرپرائزز اپنے قیام کے وقت سے لے کر دو سال تک ان ضوابط سے فائدہ اٹھاسکتے ہیں۔
