ابہا ایئرپورٹ کو پروازوں کے لیے کھول دیا گیا

عرب اتحاد کے ترجمان نے کہا ہے کہ ’شہریوں اور سول تنصیبات کے تحفظ کے لیے ضروری اقدامات کیے جائیں گے اور حوثی دہشتگردوں کا احتساب بین الاقوامی انسانی قانون کے مطابق ہوگا‘۔  

سبق ویب سائٹ کے مطابق عرب اتحاد کے ترجمان نے بتایا  کہ’ ابہا انٹرنیشنل ایئرپورٹ پروازوں کے لیے کھول دیا گیا ہے۔ معمول کے مطابق پروازیں آنے جانے لگی ہیں‘۔ 

 ادھرسعودی حکام نے ابہا انٹرنیشنل ایئرپورٹ پر کھڑے اس مسافر طیارے کی تصاویر جاری کی ہیں جو حوثی دہشتگردوں کے حملے سے متاثر ہوا ہے۔ 

الاخباریہ چینل کے مطابق تصاویر سے ظاہر ہورہا ہے کہ’ طیارہ بڑی تخریب کاری سے دوچار ہوا ہے۔ حوثیوں کے حملے سے طیارے میں آگ لگ گئی تھی جسے بروقت کارروائی کرکے بجھا دیا گیا‘۔  

الاخباریہ چینل نے بتایا کہ’ ابہا انٹرنیشنل ایئرپورٹ سے کئی پروازیں روانہ ہوئیں اور متعدد پروازیں وہاں پہنچیں جبکہ ملتوی ہونے والی پروازوں کا نیا شیڈول جاری کردیا گیا۔ حوثیوں کے حملے کے وقت ابہا ایئرپورٹ کا ہال مسافروں سے بھرا ہوا تھا‘۔ 

ٹی وی رپورٹ میں بتایا گیا ہے کہ’ دہشتگردانہ حملے سے ابہا کی آبادی متاثر نہیں ہوئی۔ ایئرپورٹ آنے جانے والے راستے اور آس پاس کے تجارتی مقامات کے معمولات میں کوئی تبدیلی نہیں ہوئی ہے‘۔