کورونا کے 337 نئے مریض، ریاض ریجن میں زیادہ کیسز

سعودی عرب میں کورونا کے نئے کیسز ایک ماہ سے مسلسل 300 سے زیادہ سامنے آ رہے ہیں۔ 

سبق نیوز نے وزارت صحت کی جانب سے جاری بیان کے حوالے سے بتایا ہے کہ’ جمعے کو گذشتہ 24 گھنٹے میں کورونا کے 337 نئے مریض سامنے آئے جبکہ 346 افراد وائرس سے صحت یاب بھی ہوئے ہیں۔‘

وزرات صحت کے مطابق ’گذشتہ 24 گھنٹے کے دوران کورونا کے مزید چار مریض چل بسے۔ جس کے بعد مرنے والوں کی تعداد چھ ہزار 445 ہو گئی ہے۔‘

وزارت صحت کا کہنا ہے کہ ’مملکت میں کورونا کے ایکٹیو کیسزکی تعداد دو ہزار 649 ہے، جن میں سے 497 کی حالت نازک ہے جو انتہائی نگہداشت کے یونٹس میں زیرعلاج ہیں۔‘

جاری اعداد و شمار کے مطابق سب سے زیادہ مریض ریاض ریجن میں سامنے آئے، جن کی تعداد 163 ہے جبکہ الشرقیہ ریجن میں 70 افراد میں وائرس کی تصدیق ہوئی ہے۔

 مکہ ریجن میں کورونا کے 48 مریض سامنے آئے جبکہ القصیم ریجن میں 12 افراد میں کورونا وائرس کی تصدیق ہوئی ہے۔

 الجوف ریجن میں نو، مدینہ اور عسیر ریجن میں سات، سات، نجران ریجن میں پانچ، الحدود الشمالیہ اور حائل ریجن میں چار، چار، جازان اور تبوک ریجن میں تین، تین جبکہ الباحہ ریجن میں دو مریض سامنے آئے ہیں۔

اب تک تین لاکھ 74 ہزار 366 افراد میں کورونا وائرس کی تصدیق ہو چکی ہے جن میں سے تین لاکھ 65 ہزار 363 افراد شفایاب بھی ہوئے ہیں۔

وزارت صحت کا کہنا ہے کہ کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔