غیر ملکی یاٹس کو سعودی حدود میں داخل ہونے کے لیے 30 منٹ میں لائسنس کا اجرا

سیاحوں کی یاٹس کو آدھے گھنٹے میں داخلے کے لائسنس کی فراہمی کے لیے سعودی عرب کے فوجی اور سرکاری ملازمین جدہ کے بحیرہ احمر آپریشن سینٹر میں 24 گھنٹے کام کر رہے ہیں۔

عرب نیوز کے مطابق ملٹی ایجنسی سینٹر غیر ملکی یاٹ مالکان اور ان کے مقامی ایجنٹوں کی لائنسس حاصل کر کے سعودی بحری حدود میں داخل ہونے کے لیےعربی اور انگریزی میں رہنمائی کرتے ہیں۔

اس سینٹر کا مقصد ولی عہد شہزادہ محمد بن سلمان کے سمندری سرگرمیوں کے مقاصد کے لیے ملک میں داخلے کی سہولت کے ذریعے سیاحت کو فروغ دینے کے منصوبے کو تقویت پہنچانا ہے۔

یہ سینٹر سعودی بارڈر گارڈز حکومتی اداروں جیسے وزارت صحت، وزارت سیاحت، ڈائریکٹوریٹ آف پاسپورٹس، ٹرانسپورٹ جنرل اتھارٹی، سعودی پورٹس اتھارٹی اور پبلک انویسمنٹ فنڈ کے ساتھ مل کر چلا رہے ہیں۔

سینٹر کے مینیجر کمانڈر حسن الاسمری کا کہنا ہے کہ ’اس سینٹر کا آغاز ولی عہد شہزادہ محمد بن سلمان کی سیاحت کو تقویت دینے اور سعودی ویژن 2030 کے حصول میں معاونت کے لیے سمندری سرگرمیوں کے لیے ایک محکمہ قائم کرنے کی ہدایات پر عمل درآمد کے لیے کیا گیا ہے۔‘

’کسی بھی درخواست میں یاٹ کی رجسٹریشن، اس کی درجہ بندی اور اس کی سمندری ریڈیو سرٹفیکشن شامل ہونی چاہیے۔ لائسنس کے لیے درخواست دینے کے لیے جہاز کے عملے، سیفٹی اور انشورنس سرٹیفکیٹ کے ناموں کی ایک فہرست بھی ضروری ہے۔ 30 منٹ میں ہم منظور شدہ لائسنس کے ساتھ ای میل کے ذریعہ درخواست کا جواب دیتے ہیں۔‘

لائسنس کی درخواستیں سعودی عرب کے اندر سے ٹول فری نمبر 1980 کے ذریعے اور بیرون ملک سے 009661980 کے ذریعے دی جا سکتی ہیں۔

اس کے علاوہ ای میل کے ذریعے [email protected] پر بھی درخواست بھیجی جا سکتی ہے۔

کمانڈر حسن الاسمری کا کہنا تھا کہ یہ سروس مملکت سے باہر کے تمام غیر ملکی سیاحتی یاٹ مالکان، شپنگ ایجنٹوں اور سیاحوں کے ایجنٹوں کو فراہم کی گئی ہے۔

انہوں نے کہا کہ وزیر داخلہ شہزادہ عبدالعزیز بن سعود بن نائف نے مرکز کے قیام کا حکم دیا تھا۔

انہوں نے مزید کہا کہ جب سے اس سینٹر کا آغاز ہوا ہے، غیر ملکی یاٹس کو مملکت میں داخل ہونے اور اس کے پانیوں میں سفر کرنے کے لیے تقریباً 30 لائسنس جاری کیے گئے ہیں۔