انڈیا کی شکست: ’محمد شامی پر آن لائن حملے پریشان کن ہیں‘

پاکستان کے خلاف میچ میں دس وکٹوں کی شکست سہنے والی انڈین ٹیم کے فینز نے بولر محمد شامی کو ان کی بولنگ پر تنقید کا نشانہ بناتے ہوئے غداری کا الزام تک لگا ڈالا جس پر بعض سابق انڈین کرکٹرز و دیگر شخصیات نے اس معاملے کو تشویشناک قرار دیا ہے۔

انڈیا کے سابق کرکٹر وریندر سہواگ کا کہنا ہے کہ ’محمد شامی پر حملے شاکنگ ہیں۔‘

انڈین بولر محمد شامی اپنی پرفارمنس کی وجہ سے انڈین فینز کی تنقید کا نشانہ بنے تو یہ سلسلہ اتنا بڑھا کہ ان کا نام ٹوئٹر کی ٹرینڈز لسٹ میں سب سے اوپر آ گیا۔

وریندر سہواگ کا کہنا تھا کہ ’محمد شامی پر حملے شاکنگ ہیں، ہم ان کے ساتھ ہیں۔ وہ ایک چیمپیئن ہے اور کوئی بھی جو انڈین کیپ پہنتا ہے کسی بھی آن لائن ہجوم سے زیادہ اپنے دل میں انڈیا کو رکھتا ہے۔‘

انہوں نے مزید لکھا کہ ’شامی میں آپ کے ساتھ ہوں، اگلے میچ میں دکھاؤ اپنا جلوہ۔‘

سابق انڈین کرکٹر عرفان پٹھان نے معاملے پر تبصرہ کیا تو اس ’گھٹیا انداز کو فورا روکنے‘ کا مطالبہ کیا۔

اپنی ٹویٹ میں انہوں نے لکھا کہ ’جب میں انڈیا بمقابلہ پاکستان مقابلوں کا حصہ تھا تو ہم ہارے بھی لیکن کبھی یہ نہیں کہا گیا کہ پاکستان چلے جاؤ۔‘

کچھ دیگر انڈین صارفین نے بھی محمد شامی پر تنقید پر ناپسندیدگی کا اظہار کیا تو میچ کے اعداد وشمار کا حوالہ دیتے ہوئے موقف اپنایا کہ محمد شامی کے آخری اوور سے پہلے ہی میچ کا فیصلہ ہو چکا تھا۔

پاکستان کے خلاف انڈین ٹیم کی دس وکٹوں سے شکست کا الزام محمد شامی کو دینے والے ان کی ’خراب پرفارمنس‘ کو جان بوجھ کر مدمقابل مسلمان ٹیم کے ساتھ ہمدردی قرار دیتے رہے۔

میچ کے فورا بعد سے ہی محمد شامی کے سوشل میڈیا اکاؤنٹ اور دیگر پلیٹ فارمز پر شروع ہو جانے والی تنقید کے دوران جہاں ان کے لیے نامناسب القابات استعمال کیے گئے وہیں انہیں پاکستانی جاسوس اور غدار تک قرار دیا گیا۔

محمد شامی پر تنقید کرنے والوں کو جواب دیتے ہوئے دیوانس ورما نامی ایک ٹویپ نے لکھا ’یاد کریں وہ انڈین ٹیم کے لیے کیا کارنامے سرانجام دے چکے ہیں۔‘

ایک جانب محمد شامی پر تنقید ہوتی رہی تو دوسری جانب انڈیا سے تعلق رکھنے والے دیگر افراد میچ کے دوران گراؤنڈ اور اس کے باہر پیش آنے والی صورتحال کا ذکر کرتے ہوئے اپنے جذبات کا اظہار کرتے رہے۔

انڈین ٹینس سٹار ثانیہ مرزا نے میچ کے دوران اپنے شوہر شعیب ملک کے لیے ’جیجا جی‘ کے نعرے لگتے دیکھتے تو اپنے جذبات کا اظہار ایموجیز کے ذریعے کیا۔

اتوار کو ٹی 20 ورلڈ کپ کے سپر 12 مرحلے کے اہم میچ میں پاکستانی ٹیم نے ٹاس جیت کر انڈیا کو پہلے بیٹنگ کی دعوت دی تھی۔ کوہلی الیون نے مقررہ اوورز میں 151 رنز بنائے، جواب میں بیٹنگ کرتے ہوئے پاکستانی اوپنرز محمد رضوان اور بابر اعظم نے ناقابل شکست رہتے ہوئے اٹھاریں اوور میں ہدف حاصل کر کے میچ اپنے نام کر لیا۔

پاکستان سمیت دنیا کے متعدد دیگر ملکوں میں کرکٹ شائقین کے جشن کا موقع بننے والا یہ لمحہ اس لیے بھی خاص تھا کہ ٹی 20 اور ایک روزہ ورلڈ کپ مقابلوں میں یہ گرین شرٹس کی انڈین ٹیم کے خلاف پہلی کامیابی ہے۔