عرب اتحاد نے یمن کو آزاد کرانے کے لیے بڑے آپریشن کا اعلان کردیا

عرب اتحاد برائے یمن کے ترجمان بریگیڈیئر ترکی المالکی نے  جنوبی یمن کے معروف علاقے شبوہ میں منگل کو پریس کانفرنس کی- انہوں نے پورے یمن کو آزاد کرانے کے آپریشن کا اعلان کردیا- اس موقع پر شبوہ کے  گورنر عوض العولقی بھی موجود تھے-

سبق ویب سائٹ کے مطابق المالکی نے کہا کہ ’یہ بڑا تاریخی لمحہ ہے- شبوہ کا چپہ چپہ حوثیوں سے اّزاد کرالیا گیا ہے‘-

بریگیڈیئر المالکی نے کہا کہ ’شبوہ کو آزاد کرانے کے لیے جانوں کا نذرانہ پیش کیا گیا ہے- نذرانہ پیش کرنے والوں کو سلام پیش کرتے ہیں‘-

شبوہ کے  گورنر عوض العولقی نے ’عرب اتحاد برائے یمن کا شکریہ ادا کرتے ہوئے کہا کہ شبوہ کی بازیابی میں عرب اتحاد کے فضائیہ کی مدد قابل قدر ہے‘-

المالکی نے کہا کہ ’آج صبح سے ہم ہر محاذ پر عسکری آپریشن کا اعلان کرتے ہیں- یہ عسکری زبان والا خالص آپریشن نہیں ہوگا بلکہ  یمن کو خوشحال اور ترقی یافتہ بنانے والا آپریشن ہوگا- یمن تعمیر و ترقی اور خوشحالی میں خلیجی ممالک کے ہمسر بن جائے  گا‘-

شبوہ کے گورنر عوض نے کہا کہ ’ہم بڑے فخر کے ساتھ یہ اعلان کررہے ہیں کہ شبوہ کا چپہ چپہ آزاد ہوچکا ہے‘-

المالکی نے کہا کہ ’حوثیوں کی خلاف ورزیاں ڈھکی چھپی نہیں ہیں سب کی نظروں میں ہیں- ہمارے پاس ٹھوس ثبوت ہیں کہ ایران حوثیوں کو اسلحہ سمگل کررہا ہے‘-

المالکی نے توجہ دلائی کہ ’ایک وڈیو کے بارے میں چہ میگوئیاں ہورہی ہیں مغالطہ آمیز انداز سے یہ ہماری جانب سے جاری کردی گئی- ہم اپنی اس غلطی کو تسلیم کرتے ہیں- ہم ابلاغی عمل  ہو یا عسکری آپریشن ہر معاملے میں اعتبار اور شفافیت برقرار رکھنےکے لیے پرعزم ہیں‘-

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں