امارات میں کورونا کے نئے کیسز کم ہونے لگے

متحدہ عرب امارات میں کورونا کے نئے کیسز میں کمی ہوئی ہے۔ گذشتہ 24 گھنٹوں کے دوران دو ہزار 355 نئے مریض سامنے آئے ہیں۔

وزارت صحت کے مطابق سنیچر کو گذشتہ 24 گھنٹوں کے دوران کورونا کے 4 لاکھ 85 ہزار 322 ٹیسٹ کیے گئے۔

امارات کے سرکاری خبر رساں ادارے ’وام‘ نے وزارت صحت کے حوالے سے بتایا کہ نئے کیسز کے بعد متاثرین کی کل تعداد 8 لاکھ 40 ہزار 739 تک پہنچ گئی ہے۔

بیان میں کہا گیا کہ ’گذشتہ 24 گھنٹوں کے دوران ایک ہزار 329 افراد صحت یاب ہوئے ہیں۔ صحت یاب ہونے والوں کی تعداد بڑھ کر7 لاکھ 75 ہزار172 ہوگئی ہے۔‘

زیرعلاج مریضوں میں سے مزید 5 افراد چل بسے، مرنے والوں کی کل تعداد دو ہزار 239 ہوگئی ہے۔

علاوہ ازیں وزارت صحت نے بیان میں کہا کہ ’گذشتہ 24 گھنٹوں کے دوران کورونا ویکسین کی مزید 36 ہزار 191 خوراکیں دی گئی ہیں۔ اب تک 2 کروڑ 35 لاکھ 13 ہزار 867 خوراکیں دی جاچکی ہیں۔‘