تجارتی پردہ پوشی، ایک ماہ میں چار ہزار 844 تفتیشی کارروائیاں

سعودی وزارت تجارت کے ماتحت تفتیشی ٹیموں نے پچھلے ماہ مارچ کے دوران تجارتی پردہ پوشی قانون کی خلاف ورزیوں کا پتہ لگانے اور ریکارڈ کی جانچ پڑتال کے لیے چار ہزار 844 چھاپے مارے ہیں۔

الاقتصادیہ کے مطابق وزارت تجارت کے انسپکٹرز تجارتی پردہ پوشی کے خلاف مہم کے دوران مصنوعی ذہانت اور ڈیٹا کے تجزیے پر انحصار کر رہے ہیں۔ 20 سرکاری اداروں کے تعاون سے یہ کام انجام دیا جارہا ہے۔ مشکوک اداروں پر نظر رکھی جا رہی ہے۔ 

اس حوالے سے غذائی اشیا، لانڈریز، صالون (باربر شاپس)، سپیئر پارٹس کی دکانوں، ورکشاپس، المونیم اور بیٹریاں فروخت کرنے والی دکانیں، ملبوسات کے تجارتی مراکز، فرنیچرز کے شورومز، ملبوسات اور آرائشی اشیا کی دکانیں، علاوہ ازیں میک اپ، تحائف اور آسائشی اشیا فروخت کرنے والے مراکز کی تلاشی لی جارہی ہے۔ 

وزارت تجارت ایسے اداروں کے مالکان کو جن کے خلاف تجارتی پردہ پوشی کے ٹھوس ثبوت ملتے ہیں متعلقہ اداروں کی تحویل میں دے دیتی ہے۔ 

یاد رہے کہ مملکت میں تجارتی پردہ پوشی کی سزا  5 برس قید، پچاس لاکھ ریال  جرمانہ اور ممنوعہ اثاثوں کی ضبطی وغیرہ ہے۔ تجارتی پردہ پوشی سے مراد غیرملکی کا سعودی کے نام سے کاروبار کرنا اور سعودی کا اسے اپنے نام سے کاروبار کرانا ہے۔