خروج وعودہ پر جا کر واپسی نہیں ہوئی، وزٹ ویزے پر آسکتے ہیں؟

سعودی محکمہ امیگریشن اینڈ پاسپورٹ جسےعربی میں ’جوازات‘ کہا جاتا ہے کے ضوابط میں بعض تبدیلیاں کی گئیں ہیں جن پرعمل درآمد جاری ہے۔

محکمہ جوازات کی بیشترسروسز ڈیجیٹل ہیں جن سے لوگوں کو کافی سہولت ہوتی ہے۔

ڈیجیٹل سروسز کے ذریعے ابشرپلیٹ فارم سے اقاموں کی تجدید خروج وعودہ یا خروج نہائی اوروزٹ ویزوں کا اجرا کی سہولت بھی حاصل کی جاتی ہے۔

ایک شخص نے جوازات کے ٹوئٹرپردریافت کیا ’سعودی عرب میں ڈاکٹرکے پیشے پرکام کرتا تھا 2019 میں خروج وعودہ پرگیا مگرواپس نہیں آیا کیا اب وزٹ ویزے پرجاسکتے ہیں؟‘

جوازات کا کہنا تھا کہ خروج وعودہ قانون کے مطابق وہ تارکین وطن جو اقامہ پرمملکت میں مقیم ہیں۔ خروج وعودہ کی خلاف ورزی کے مرتکب ہونے کی صورت میں انہیں مملکت میں تین برس کےلیے بلیک لسٹ کردیاجاتا ہے ایسے افراد جنہیں ’خرج ولم یعد‘ کی کیٹگری میں شامل کیاجاتا ہے وہ تین برس تک کسی دوسرے ویزے پرمملکت نہیں آسکتے۔

بلیک لسٹ کیے جانے والے غیر ملکی پابندی کی مدت کے دوران صرف اپنے سابق کفیل کی جانب سے جاری کردہ نئے ویزے پرہی مملکت آسکتے ہیں بصورت دیگر انہیں تین برس انتظارکرنا ہوگا۔ بلیک لسٹ کی مدت مکمل ہونے کے بعد وہ کسی بھی ویزے پرمملکت آسکتے ہیں۔

واضح رہے جو افراد خروج وعودہ کی خلاف ورزی کے مرتکب ہوتے ہیں انہیں چاہئے کہ وہ مدت کا تعین قمری کیلنڈر کے حساب سے کریں جو سعودی عرب میں رائج ہے کیونکہ جوازات کے سسٹم میں قمری تاریخوں کے حساب سے مدت کا تعین کیاجاتا ہے۔

مدت کا تعین کرنے میں بعض لوگ جو غلطی کرتے ہیں وہ انگلش تاریخ کا حساب رکھتے ہیں جس سے جوازات کے سسٹم میں درج کیلنڈرمیں دنوں کا فرق ہوجاتا ہے۔

بیرون مملکت سے ایک شخص نے جوازات کے ٹوئٹرپردریافت کیا ’بیرون مملکت بچے کی ولادت پراسے اپنے ہمراہ کس طرح لا سکتے ہیں، کیا نیا ویزہ جاری کرانا ہوگا؟‘

سوال کا جواب دیتے ہوئے جوازات کا کہنا تھا بیرون مملکت سعودی عرب کے سفارتخانے سے رجوع کیاجائے جہاں سے نومولود کے لیے انٹری ویزہ جاری کردیاجاتا ہے۔

سعودی سفارتخانے میں نومولود کے لیے انٹری ویزہ جاری کرانے کےلیے لازمی ہے کہ بچہ کا جدا پاسپورٹ اوربرتھ سرٹیفکیٹ ہوجس پرانٹری ویزی جاری کیاجاتاہے۔

سعودی سفارتخانے سے جاری انٹری ویزے پرمملکت آنے کے بعد بچے کا جدا اقامہ بنایاجانا لازمی ہے۔

اقامہ جاری کرانے کےلیے قانون کے مطابق غیر ملکیوں کے اہل خانہ پرعائد فیس جو کہ امسال 400 ریال ماہانہ کے حساب سے وصول کی جاتی ہے جمع کرانے کے بعد اقامہ جاری کرایاجاسکتا ہے۔

اقامہ کارڈ کےلیے نومولود بچے کی رنگیں تصویر جو سفید بیک گراونڈ کی ہومقررہ فارم کے ساتھ جمع کرائی جائے گی تاکہ اقامہ کارڈ جاری ہوسکے۔