انٹرنیشنل سائنس اینڈ انجینئرنگ فیئر میں کامیابی کے بعد سعودی ٹیم کی واپسی 

35 طلبہ پر مشتمل سعودی سائنس اور انجینئرنگ ٹیم امریکی شہر ڈیلاس میں ریجنیرون انٹرنیشنل سائنس اور انجینئرنگ فیئر میں شرکت، 23 بڑے اور چار خصوصی انعامات سمیت 27 انعامات  جیتنے کے بعد ریاض کے کنگ خالد انٹرنیشنل ایئرپورٹ پہنچ گئی۔  

واضح رہے کہ سعودی طلبہ نے گزشتہ سال انٹرنیشنل سائنس اور انجینئرنگ فیئر میں 106 انعامات حاصل کیے تھے جن میں 69 گرینڈ ایوارڈز اور 37 خصوصی ایوارڈز شامل ہیں۔

سعودی ٹیم کے ارکان نے اس سال سعودی اور غیرملکی ٹرینرز سے ٹریننگ حاصل کی جن میں مختلف شعبوں میں ماہرین تعلیم، ماہرین اور ثالث شامل ہیں۔

امریکہ میں 13 سے 19 مئی تک  ہونے والے انٹرنیشنل سائنس اور انجینئرنگ ایونٹ میں 70 سے زائد ممالک کے ایک ہزار 800 افراد نے شرکت کی۔

سرکاری خبررساں ادارے ایس پی اے کے مطابق ارض وطن پہنچنے پر سعودی ٹیم کا شاندار استقبال کیا گیا۔

خیر مقدم کرنے والوں میں ’موھبہ‘ کے سربراہ  فیصل الدویش، فاؤنڈیشن کی سیکریٹری جنرل ڈاکٹر امال الھزاع، سیکریٹری تعلیم ڈاکٹر محمد المقبل اور دیگر شامل تھے۔

سیکریٹری جنرل ڈاکٹر امال الھزاع نے کہا کہ ’سعودی عرب نے 23 بڑے میڈلز جیت کر پوری دنیا میں دوسری پوزیشن حاصل کی ہے۔ یہ قومی تاریخی کامیابی اعلی قیادت کی سرپرستی،  ٹیم کی انتھک جدوجہد، موھبہ اور وزارت تعلیم کے درمیان منفرد سٹراٹیجک شراکت کا نتیجہ ہے‘۔ 

ڈاکٹر امال الھزاع نے کہا کہ’ ہمارے یہ نوجوان  سعودی وژن 2030 کا ستون ہیں۔ یہ بڑے بین الاقوامی اداروں میں مملکت کی نمائندگی کرکے یہ پیغام دے رہے ہیں کہ وہ خوشحال معیشت، آگے کی طرف دیکھنے والے وطن عزیز کے نوجوان ہیں‘۔ 

سعودی ٹیم نے بڑے ایوارڈ میں پہلی پوزیشن کے دو انعامات، دوسری پوزیشن کے سات انعامات، تیسری پوزیشن کے سات انعامات اور چوتھی پوزیشن کے سات انعامات جیتے۔

یہ 2007 کے بعد سے انٹرنیشنل سائنس اور انجینئرنگ فیئر میں مملکت کی مسلسل 17ویں شرکت ہے جو کہ وزارت تعلیم کے اشتراک سے موھبہ کی طرف سے منعقد کردہ سالانہ پروگرام کے حصے کے طور پر ہے۔

ٹیم کے اراکین کا انتخاب نیشنل اولمپیاڈ فار سائنٹیفک کریٹیوٹی ’ ابداع 2023 ‘ کے فاتحین میں سے کیا گیا  جو مختلف پروگراموں میں سے ایک ہے جسے موھبہ ہونہار طلبہ کے لیے سالانہ پیش کرتا ہے۔

اس سال کی کامیابیوں نے انٹرنیشنل سائنس اور انجینئرنگ فیئر میں مملکت کے جیتنے والے مجموعی انعامات کی تعداد 133 تک بڑھا دی ہے۔ ان میں 92 گرینڈ ایوارڈز اور 41 خصوصی ایوارڈز شامل ہیں۔