معروف یوٹیوبر کی کرسٹیانو رونالڈو سے ملاقات

معروف امریکی یوٹیوبر آئی شو سپیڈ کی بالآخر پرتگال کے سپرسٹار کرسٹیانو رونالڈو سے ملاقات ہو گئی۔

اتوار کے روز آئی شو سپیڈ کے مداحوں میں تب خوشی کی لہر دوڑ گئی جب انہوں نے اپنے سوشل میڈیا پر اپنے رول ماڈل کرسٹیانو رونالڈو سے ملاقات کی تصاویر اور ویڈیوز شیئر کیں۔

آئی شو سپیڈ المعروف سپیڈ کے یوٹیوب چینل پر اپلوڈ ہونے والی ویڈیو میں انہیں پرتگالی سپرسٹار سے ملتے ہوئے دیکھا جا سکتا ہے۔

ویڈیو میں دیکھا جا سکتا ہے کہ سپیڈ رونالڈو کا انتظار کر رہے ہوتے ہیں، پھر رونالڈو اپنی گاڑی میں آتے ہیں اور پھر گاڑی سپیڈ کے پاس روکتے ہیں اور باہر نکل کر سپیڈ سے ملاقات کرتے ہیں۔

اس ملاقات کے دوران آئی شو سپیڈ خوشی کے مارے پھولے نہیں سماتے اور رونالڈو کے ساتھ مل کر ان کا مشہور جشن ’سُیو‘ بھی کرتے ہیں۔

اس ملاقات کے دوران رونالڈو نے سپیڈ کو یہ بھی بتایا کہ ’مجھے میرے بیٹے نے بتایا تھا، آپ یہاں آنے والے ہو۔‘

میڈیا رپورٹس کے مطابق سپیڈ کی اپنے پسندیدہ فٹبالر سے ملاقات رونالڈو کے ساتھی کھلاڑی رافیل لیآؤ کے بدولت ہوئی ہے۔

اس سے قبل رونالڈو کے حوالے سے آئی شو سپیڈ کی ویڈیو گزشتہ سال قطر میں کھیلے گئے فیفا فٹبال ورلڈ کپ کے دوران بھی وائرل ہوئی تھی جس میں وہ پرتگال کی مراکش کے ہاتھوں اپ سیٹ ہار کے بعد دھاڑیں مار مار کر روئے تھے۔

گزشتہ برس جب رونالڈو انگلش پریمیئر لیگ (ای پی ایل) کے کلب مانچسٹر یونائیٹڈ کا حصہ تھے تب سپیڈ مانچسٹر یونائیٹڈ کے ہوم گراؤںڈ اولڈ ٹریفڈ میں بھی گئے تھے, تاہم اُن کی وہاں اپنے سٹار سے ملاقات نہ ہو سکی تھی۔

آئی شو سپیڈ کون ہیں؟

آئی شو سپیڈ امریکہ سے تعلق رکھنے والے یوٹیوبر، ویلاگر اور آن لائن سٹریمر ہیں۔ وہ یوٹیوب پر ایک کروڑ 70 لاکھ (17 ملین) سبسکرائبرز رکھتے ہیں۔ سپیڈ کا اصلی نام ڈیرن واٹکنز جونیئر ہے اور ان کی عمر وکی پیڈیا کے مطابق 18 برس ہے۔

رونالڈو سے ملاقات کے بعد سماجی رابطوں کی ویب سائٹ ٹوئٹر پر صارفین آئی شو سپیڈ کے لیے ٹویٹس بھی دیکھنے کو مل رہی ہیں۔

نتالیا اپنی ٹویٹ میں لکھتی ہیں کہ ’میں اس (سپیڈ) کے لیے بہت خوش ہوں اور میں اس کا کانٹینٹ بھی نہیں دیکھتی۔‘

مشعل مکی نے کہا کہ ’سپیڈ میں تمہارے لیے بہت خوش ہوں۔‘

ٹوئٹر ہینڈل ہاک ڈاؤن نے تبصرہ کیا کہ ’یہ بہت مزاحیہ ہے۔ ان کی انرجی کا کوئی مقابلہ نہیں ہے۔‘

ٹوئٹر ہینڈل میڈرڈ فٹی نے ٹویٹ میں لکھا کہ ’جیسے رونالڈو سپیڈ سے گلے ملے، اس سے لگتا ہے کہ وہ سپیڈ کو جانتے تھے۔‘