پاسپورٹس کی رینکنگ کا طریقہ کار کیا ہے؟

ہر سال دنیا بھر کے ممالک کے پاسپورٹس کی فہرست جاری کی جاتی ہے جس میں مضبوط پاسپورٹ والے ممالک اور بدترین پاسپورٹ والے ممالک کی رینکنگ بتائی جاتی ہے۔
کیا آپ جانتے ہیں کہ دنیا بھر کے ممالک کے پاسپورٹ کی رینکنگ کس طرح سے کی جاتی ہے؟
بین الاقوامی فرم ہینلے اینڈ پارٹنرز دنیا بھر کے پاسپورٹس کو رینک  کرتی ہے۔

انٹرنیشنل ایئر ٹرانسپورٹ ایسوسی ایشن (IATA) اس سے متعلق ڈیٹا فراہم کرتی ہے۔
ویب سائٹ ہینلے اینڈ پارٹنرز کے مطابق دی ہینلے اوپن نیس انڈیکس (ایچ او آئی) کے پاس دنیا بھر کے 199 ممالک کے پاسپورٹس کی رینکنگ جاری کرنے کا اختیار ہے۔
ہینلے اور پارٹنرز کی جانب سے پاسپورٹ کو دو طریقوں سے رینک کیا جاتا ہے۔
فری ویزا ایکسس
اگر کسی ایک ملک کا پاسپورٹ ہولڈر، دوسرے ملک میں بغیر ویزا لیے داخل ہو سکتا ہے تو اِس صورت میں ویزا دینے والے ملک کو ایک کا سکور دیا جاتا ہے۔

اس صورت حال میں ویزا آن ارائیول یعنی دوسرے ملک پہنچ کر ویزا حاصل کرنا، پرمٹ حاصل کرنا اور الیکٹرونک ٹریول اتھارٹی یعنی (ای ٹی اے) کا ویزا شامل ہے جس میں روانگی سے قبل حکومت سے ویزا لینا ضروری نہیں ہوتا۔
ایسے ویزے دوسرے ملک کے ویزا ویور پروگرام کے ماتحت ہوتے ہیں۔

ویزا ریکوائرمنٹ
اگر دوسرے ملک جانے سے پہلے کسی ملک کے پاسپورٹ ہولڈر کو اُس ملک کی حکومت سے منظور شدہ الیکٹرونک ویزا (ای ویزا) درکار ہو تو اس صورت میں ویزا دینے والے ملک کو صفر سکور دیا جاتا ہے۔ 
اگر کسی پاسپورٹ ہولڈر کو ویزا آن ارآئیول سے قبل اُس ملک کی حکومت سے منظوری لینا پڑے تو اس صورت میں بھی ویزا دینے والے ملک کو صفر سکور دیا جائے گا کیونکہ اس سسٹم کو ویزا فری تصور نہیں کیا جائے گا۔

اسی طرح ہر ملک کا مجموعی اوپن نیس سکور دوسرے ملک سے اُسے فری ویزا ملنے کے بعد طے کیا جاتا ہے۔
مضبوط ترین پاسپورٹ والے پانچ ممالک کون سے ہیں؟
اگر دنیا میں مضبوط ترین پاسپورٹ والے پانچ ممالک کی فہرست کو دیکھا جائے تو اُن میں پہلے نمبر پر سنگاپور، دوسرے نمبر پر جرمنی، تیسرے پر اٹلی، چوتھے پر سپین اور پانچویں پر آسٹریا شامل ہیں۔

بدترین پاسپورٹ والے پانچ ممالک کون سے ہیں؟
اسی طرح دنیا میں بدترین پاسپورٹ والے ممالک کی فہرست پر نگاہ ڈالی جائے تو اُن میں سے آخر میں بالترتیب یمن، پاکستان، شام، عراق اور افغانستان شامل ہیں۔
ویب سائٹ فوربز کے مطابق پاکستان کا اس رینکنگ میں 100 واں نمبر ہے اور پاکستانی پاسپورٹ سے 33 ممالک میں بغیرا ویزا کے سفر کیا جا سکتا ہے۔
پاکستانی پاسپورٹ پر جن نمایاں ممالک میں بغیر ویزا جایا جا سکتا ہے اُن میں بارباڈوس، ڈومینیکا، گیمبیا، ہیٹی، ٹرینیڈیڈ اینڈ ٹوباگو اور سینٹ ونسنٹ اینڈ دی گریناڈائنز شامل ہیں۔
اسی طرح انڈیا کی بات کی جائے تو انڈین پاسپورٹ رینکنگ میں 80 ویں نمبر پر ہے جس پر 57 ممالک میں بغیر ویزا کے سفر کیا جا سکتا ہے۔