وزیرِاعظم شہباز شریف نے ابو ظبی میں متحدہ عرب امارات کے صدر شیخ محمد بن زاید آل نہیان سے ملاقات کی ان کے بھائی شیخ سعید بن زاید آل نہیان کے انتقال پر رنج و غم کا اظہار کیا۔
وزیراعظم نے متحدہ عرب امارات کے صدر سے پوری پاکستانی قوم کی جانب سے اظہارِ افسوس کیا۔
وزیراعظم کا کہنا تھا کہ ’پاکستان اور متحدہ عرب امارت کے درمیان مشترکہ عقیدے اور بھائی چارے کی بنیاد پر مضبوط تعلقات قائم ہیں۔‘
اماراتی صدرِ نے وزیراعظم شہباز شریف کے دورے پر ان کا شکریہ ادا کیا اور پاکستان اور متحدہ عرب امارات کے درمین مضبوط سفارتی تعلقات کا بھی ذکر کیا۔
ملاقات میں وفاقی وزیر خزانہ اسحاق ڈار اور معاون خصوصی طارق فاطمی بھی موجود تھے۔
اس سے قبل محل پہنچنے پر متحدہ عرب امارات کے صدر شیخ محمد بن زاید النہیان نے وزیرِاعظم کا استقبال کیا۔
وزیرِاعظم شہباز شریف متحدہ عرب امارات کے صدر شیخ محمد بن زاید آل نہیان کے بھائی شیخ سعید بن زاید آل نہیان کے انتقال پر تعزیت کے لیے جمعے کو ابو ظبی پہنچے۔
وزیرِاعظم ہاؤس کے مطابق متحدہ عرب امارت پہنچنے پر وزیرِاعظم شہباز شریف کا پاکستان کے یو اے ای میں سفیر، اعلٰی اماراتی حکام اور پاکستانی سفارتی اہلکاروں نے کا استقبال کیا۔
