شہزادہ خالد بن سلمان کا امریکی وزارت دفاع میں شاندار استقبال، ہم منصب سے ملاقات

سعودی وزیر دفاع شہزادہ خالد بن سلمان نے امریکی ہم منصب پیٹ بیگستھ سے ملاقات کی ہے۔

سعودی پریس ایجنسی کے مطابق دار الحکومت واشنگٹن میں وزارت دفاع کے صدر دفتر میں شہزادہ خالد بن سلمان کاشاندار استقبال کیا گیا جس میں گارڈ آف آنر کا معائنہ کیا گیا اور دونوں ممالک کے قومی ترانے بجائے گئے۔

 اس موقع پر شہزادہ خالد بن سلمان نے وزٹ کے باضابطہ ریکارڈ میں تاثرات درج کئے۔

بعد ازاں سعودی وزیر دفاع نے امریکی وفد کے ارکان سے جبکہ امریکی وزیر دفاع نے سعودی وفد کے ارکان سے مصافحہ کیا۔

سعودی وزیر دفاع  شہزادہ خالد بن سلمان اور امریکی وزیر دفاع پیٹ بیگستھ کے درمیان دو طرفہ اجلاس منعقد ہوا جس میں دونوں ممالک کے درمیان تاریخی دوستی اور اسٹریٹجک شراکت داری پر زور دیا گیا۔
اجلاس میں عسکری اور دفاعی شعبے میں تعاون کو مزید مضبوط اور ترقی دینے کے طریقوں پر تبادلہ خیال کیا گیا۔

علاقائی اور بین الاقوامی صورتحال پر بھی گفتگو ہوئی اور امن و استحکام کے قیام کے لیے کی جانے والی کوششوں کا جائزہ لیا گیا۔

واضح رہے کہ سعودی وزیر دفاع شہزادہ خالد بن سلمان پیر کو سرکاری دورے پر واشنگٹن پہنچے تھے۔

دورے کا مقصد امریکہ اور سعودی عرب کے درمیان تعلقات کو مستحکم کرنا ہے۔

شہزادہ خالد بن سلمان دورے کے دوران ملاقاتوں میں مشترکہ مفاد کے امور پر تبادلہ خیال کریں گے۔

یاد رہے کہ امریکہ میں سعودی سفیر شہزادی ریما نے فیوچر انویسٹمنٹ انیشٹیو ترجیحی میامی 2025 سمٹ میں امریکی صدر ٹرمپ کا خیر مقدم کیا تھا۔

شہزادی ریما نے ایکس اکاونٹ پر لکھا کہ ’سعودی عرب اور امریکہ کے درمیان مضبوط تعلقات مزید فروغ پا رہے ہیں۔‘

’مضبوط اور بڑھتے ہوئے سعودی امریکہ تعلقات ایک ساتھ  زیادہ خوشحال مستقبل کےلیے ناقابل تصور مواقع پیدا کررہے ہیں۔‘

 سمٹ کے آغاز کے دوران صدر ڈونلڈ ٹرمپ نے ولی عہد شہزادہ محمد بن سلمان کا ریاض میں یوکرین جنگ پر امریکہ اور روس کے درمیان مذاکرات کی میزبانی کرنے پر شکریہ ادا کیا تھا۔