دبئی ایئرپورٹ پر عراقی طیارے سے ریچھ کے ’فرار‘ کی تحقیقات

متحدہ عرب امارات میں دبئی ایئرپورٹ پر بغداد جانے والےعراقی مسافر طیارے میں ایک ریچھ کے’ فرار‘ کی وڈیو سوشل میڈیا پر وائرل ہے۔ 

ایک مسافر کی جانب سے شیئر کی گئی وڈیو میں ریچھ کے بچے کو کارگو ہولڈ میں اپنے مخصوص کریٹ سے باہر گھومتے ہوئے دیکھا جا سکتا ہے۔

الامارات الیوم کے مطابق عراقی وزیراعظم محمد شیاع سودانی نے وزارت ٹرانسپورٹ کو عراقی طیارے سے ریچھ کے’ فرار‘ ہونے کے واقعے کی تحقیقات کا حکم دیا ہے۔

 ریچھ کے فرار ہونے کی وڈیو وائرل ہونے کے بعد سوشل میڈیا پر مسافروں کی سلامتی کے حوالے سے سنجیدہ سوالات اٹھائے جا رہے ہیں۔ 

عراقی ایئرویز نے طیارے کے کارگو سیکشن سے ریچھ کے فرار کے واقعہ پر مسافروں سے معذرت کی ہے۔

اس واقعہ پر دبئی سے بغداد جانے والی پرواز میں ایک گھنٹے سے زیادہ کی تاخیر ہوئی۔

ایئر ویز نے سوشل میڈیا پر گردش کرنے والی وڈیو کے بعد جاری بیان میں کہا کہ ’جو کچھ ہوا وہ ہماری دسترس سے باہر تھا۔  پنجرے سے ریچھ کے فرار ہونے سے مسائل پیدا ہوئے‘۔ 

 طیارے کے عملے نے حکام کے ساتھ  فوری رابطے کیے۔ اماراتی حکام نے خصوصی ٹیم بھیجی جس سے ریچھ کو بے ہوش کرکے طیارے سے اتار دیا۔

مسافروں کی سلامتی کے لیے اقدامات کے بعد عراقی طیارہ اپنی منزل کے لیے روانہ ہوا۔ 

بیان میں مزید کہا گیا کہ’ ریچھ کو جانوروں کی فلاح وبہبود کے بین الاقوامی رہنما اصولوں کے مطابق منتقل کیا جا رہا تھا‘۔

تاہم ایئر ویز نے ریچھ کو طیارے سے اتارنے کے بعد کی صورتحال کے حوالے سے کچھ نہیں بتایا۔

دبئی ایئرپورٹ انتظامیہ نے بھی اس حوالے سے کوئی بیان جاری نہیں کیا۔

سی سی این نے عراقی ٹرانسپورٹ اتھارٹی کے حوالے سے بتایا کہ ’طیارے میں ایک نہیں دو ریچھ تھے۔ ان میں سے ایک اپنا کریٹ توڑ کر باہر نکل آیا۔ جسے اماراتی حکام نے بے ہوش کرکے طیارے سے اتارا‘۔