امید ہے شاہ سلمان کی دعوت پر ایرانی صدر سعودی عرب کا دورہ کریں گے: وزیر خارجہ

سعودی عرب کے وزیر خارجہ شہزادہ فیصل بن فرحان نے امید ظاہر کی ہے کہ شاہ سلمان بن عبدالعزیز کی دعوت پر ایرانی صدر ابراہیم رئیسی مملکت کا دورہ کریں گے۔

سعودی وزیر خارجہ اپنے ایرانی ہم منصب کے دورہ سعودی عرب کے موقع پر جمعرات کو ریاض میں مشترکہ نیوز کانفرنس سے خطاب کر رہے تھے۔

اس موقع پر ایرانی وزیر خارجہ حسین امیر عبداللهیان نے تصدیق کی کہ صدر رئیسی جلد سعودی عرب کا دورہ کریں گے۔

اس سے قبل جمعرات کو ہی ایران کے وزیر خارجہ حسین امیر عبداللهیان سعودی عرب کے ساتھ سفارتی تعلقات استوار ہونے کے بعد مملکت کے پہلے سفارتی دورے پر ریاض پہنچے تھے۔

برطانوی خبر رساں ادارے روئٹرز نے ایرانی وزارت خارجہ کا حوالہ دیتے ہوئے کہا کہ سعودی وزیر خارجہ شہزادہ فیصل بن فرحان کی دعوت پر وزیر خارجہ حسین امیر عبداللهیان سعودی عرب کا دورہ کر رہے ہیں۔

ایرانی سرکاری نیوز ایجنسی ارنا نے کہا ہے کہ وزیر خارجہ حسین امیر عبداللهیان ایک روزہ دورے پر ریاض پہنچ گئے ہیں جہاں ایئرپورٹ پر سعودی نائب وزیر خارجہ نے ان کا استقبال کیا۔

ایران کے ساتھ سفارتی تعلقات استوار ہونے کے بعد سعودی وزیر خارجہ شہزادہ فیصل بن فرحان نے جون میں تہران کا پہلا سرکاری دورہ کیا تھا۔ 

اس دوران سعودی وزیر خارجہ نے اپنے ایرانی ہم منصب سے ملاقات کی تھی۔

خیال رہے کہ 6 جون کو ایران نے سعودی عرب میں سات سال بعد اپنا سفارت خانہ دوبارہ کھولا تھا۔

رواں برس مارچ میں چین کی ثالثی میں ایران اور سعودی عرب کے درمیان معاہدہ طے پایا تھا جس کے تحت سفارتی تنازع ختم کرنے اور تعلقات کی بحالی پر اتفاق ہوا تھا۔

سنہ 2016 میں مظاہرین کی جانب سے تہران میں واقع سعودی سفارت خانے پر حملے کے نتیجے میں سعودی عرب نے ایران کے ساتھ تعلقات منقطع کرلیے تھے۔