شاہی مہمانوں کا کنگ فہد قرآن کمپلکس کا دورہ

خادم حرمین شریفین عمرہ و زیارت پروگرام میں شامل شاہی مہمانوں کے تیسرے گروپ نے وزارت اسلامی امور کے ثقافتی پروگرام کے تحت کنگ فہد قرآن پرنٹنگ کمپلکس کا دورہ کیا ہے۔

سعودی پریس ایجنسی کے مطابق مہمانوں نے پرنٹنگ کمپلکس کے مختلف حصوں کا دورہ کیا جہاں انہیں قرآن کریم کے تحفظ، پرنٹنگ اور نشر و اشاعت کی کوششوں سے متعلق آگاہ کیا گیا۔

زائرین نے قرآن کریم کو مختلف زبانوں میں ترجمہ کرنے کے مراحل اور نظرثانی اور تصدیق کے عمل کا معائنہ کیا جبکہ مہمانوں کو پرنٹنگ پریس کی جانب سے ان کی زبان میں ترجمہ شدہ قرآن کا  تحفہ بھی دیا گیا۔

شاہی مہمانوں نے پرنٹنگ پریس کی کوششوں کی تعریف کی اور کہا کہ کنگ فہد پرنٹنگ کمپلکس لاکھوں کی تعداد میں قرآن کریم کے نسخوں کی طباعت اور تقسیم کی ذمہ داری پوری کرتا ہے جو کہ تمام مسلمانوں کی نگاہ قابل قدر عمل ہے۔

علاوہ ازیں شاہی ضیافت پر آنے والے زائرین نے مدینہ منورہ میں اپنے قیام کے دوران زائرین کو خدمات کی فراہمی پر سعودی قیادت کا شکریہ ادا کیا ہے اور مسجد نبوی کی فن تعمیر کی تعریف کی۔