پی ایس ایل: ’نہیں دیکھنی تقریب، میچ شروع کرواؤ‘

پاکستان سپر لیگ (پی ایس ایل) کے نویں ایڈیشن کا آغاز لاہور سے ہو گیا ہے۔

سنیچر کو پی ایس ایل 9 کے پہلے میچ سے قبل قذافی سٹیڈیم میں رنگا رنگ افتتاحی تقریب کا انعقاد ہوا جس میں کئی پاکستانی فنکاروں نے شرکت کی۔

افتتاحی تقریب میں نتاشہ بیگ، عارف لوہار، نوری بینڈ، علی ظفر اور آئمہ بیگ نے اپنے سُروں کا جادو بکھیرا۔

قذافی سٹیڈیم میں منعقد ہونے والی افتتاحی تقریب میں جدید اور رنگا رنگ لیزر شو کا بھی اہتمام کیا گیا جس سے پورا سٹیڈیم رنگا رنگ روشنیوں سے چمک اٹھا۔

افتتاحی تقریب کے آخر میں شاندار آتش بازی کا بھی مظاہرہ ہوا۔

پی ایس ایل 9 کی افتتاحی تقریب سے جہاں سٹیڈیم میں موجود تماشائی خوب لطف اندوز ہوئے وہیں سوشل میڈیا پر اس بارے میں صارفین کی جانب سے خیالات کا بھی اظہار کیا گیا۔
 

سماجی رابطوں کی ویب سائٹ ایکس پر جہاں کچھ صارفین افتتاحی تقریب کی تعریف کرتے دکھائی دیے وہیں چند نے اس پر تنقید بھی کی۔

سوشل میڈیا صارف اقصیٰ نے اپنی پوسٹ میں لکھا ’افتتاحی تقریب کا آغاز کرنے کا کیا شاندار طریقہ ہے۔ لاہور کا قذافی سٹیڈیم بہت شاندار لگ رہا ہے۔‘

ٹوئٹر ہینڈل صارف حمزہ تقویم نے اپنی پوسٹ میں لکھا کہ ’پی ایس ایل کی افتتاحی تقریب تو بالکل واؤ ہے۔‘

کرکٹ فین بیلا نثار اپنی پوسٹ میں لکھتی ہیں کہ ’افتتاحی تقریب کے نام پر نہایت بھونڈے پن کو دیکھنے کے لیے تیار رہیں۔‘

ٹوئٹر ہینڈل بابا فُوکا نے اپنی پوسٹ میں لکھا کہ ’پی ایس ایل کی افتتاحی تقریب ہو رہی ہے لیکن ٹائم لائن پر صرف سیاست ہی چل رہی ہے۔‘

ربعیہ نامی صارف اپنی پوسٹ میں مزاحیہ انداز میں لکھا کہ ’بھئی ہمیں نہیں چاہیے افتتاحی تقریب، میچ شروع کرواؤ۔‘

دوسری جانب پی ایس ایل کے پہلے میچ اسلام آباد یونائیٹڈ نے لاہور قلندرز کے خلاف ٹاس جیت کر پہلے فیلڈنگ کا فیصلہ کیا ہے۔