اننت امبانی اور رادھیکا کی شادی کا اختتامی مرحلہ، معروف شخصیات مبارک باد دیں گی

ایشیا کے امیر ترین شخص مکیش امبانی کے بیٹے کی شادی کے بعد کی تقریبات سنیچر سے شروع ہو رہی ہیں۔ ان شاندار تقریبات کے مہمانوں میں بالی وڈ کے ستاروں کے علاوہ عالمی سطح کے کاروباری افراد اور دو سابق برطانوی وزرائے اعظم بھی شامل ہیں۔

فرانسیسی خبر رساں ادارے اے ایف پی کے مطابق ارب پتی مکیشں امبانی کے چھوٹے بیٹے اننت امبانی اور رادھیکا مرچنٹ کئی ماہ سے جاری تقریبات کے بعد گذشتہ روز جمعے کو ممبئی میں شادی کے بندھن میں بندھ گئے۔

سنیچر کو ان کی ’شبھ آشیرواد‘ کی تقریب ہے جس میں دنیا کی امیر اور معروف شخصیات نوبیاہتا جوڑے کو مبارک باد دیں گے۔ یہ تقریب امبانی خاندان کی ملکیت کنونشن سینٹر میں ہو گی جو 16 ہزار افراد کی گنجائش رکھتا ہے۔

گذشتہ شب ہونے والی تقریب میں کِم اور کلویی کارداشیان، جان سینا اور برطانیہ کے سابق وزرائے اعظم ٹونی بلیئر اور بورس جانسن نے بھی شرکت کی تھی۔

کِم کارداشیان نے انسٹاگرام پر ویڈیوز بھی شیئر کی تھی جس میں وہ اور ان کی بہن کلویی روایتی انڈین ملبوسات اور زیورات میں تقریب کی تیاری کرتی نظر آتی ہیں۔

میزبانوں کی جانب سے شادی کی تقریب کی جاری ہونے والی ویڈیو میں سینکڑوں افراد کو روایتی انڈین ملبوسات میں ناچتے دیکھا جا سکتا ہے۔ فیفا کے باس جیانی انفینٹنو، بالی وڈ سپر سٹار شاہ رخ خان اور سام سنگ کے چیئرمین جے وائی لی کیسے مشہور اشخاص کاروبار، کھیل اور تفریحی دنیا کی سینکڑوں دیگر مشہور شخصیات میں شامل تھے۔

اس ہفتے کی تقریبات کل اتوار کو ریسپشن پارٹی کے ساتھ ختم ہو جائیں گی اور یوں کئی مہینوں سے جاری یہ جشن اپنے اختتام کو پہنچے گا۔