مملکت میں گاڑیوں کے سالانہ انسپیکشن (فحص دوری) کے لیے 6 موبائل سٹیشن

سعودی عرب میں گاڑیوں کے سالانہ انسپیکشن (فحص دوری) کے ادارے موٹر وہیکل پیریڈک انسپیکشن نے سعودی سٹینڈرڈز، میٹرولوجی اینڈ کوالٹی آرگنائزیشن کی نگرانی میں گاڑیوں کے تکنیکی معائنے کے لیے 6 موبائل سٹیشنز قائم کیے ہیں۔

عاجل نیوز کے مطابق ادارے کے سی ای او انجینیئر سطام الحزامی نے بتایا موبائل سٹیشن مملکت کے وژن 2030 کے تحت ٹریفک سیفٹی کو بڑھانے کے مقاصد کے عین مطابق اور مملکت کے جامع ترقیاتی منصوبوں میں سے ایک ہے۔

ان کا کہنا تھا موبائل سٹیشنوں کو فرانسیسی میوفیکچرر (مولر) کمپنی کے انجینیئرز کے تعاون سے تیار کیا گیا ہے جو گاڑیوں کے تکنیکی معائنے اور درست تکنیکی تفصیلات میں مدد فراہم کرے گی۔ فرانسیسی کمپنی اس کا طویل تجربہ رکھتی ہے۔

سطام الحزامی نے بتایا  موبائل انسپیکشن سٹیشن ایک اہم اقدام ہے اور بڑے اداروں کو ان کے ہیڈکوارٹرز میں گاڑیوں کے انسپیکشن کی سہولت فراہم کی جاتی ہے۔

یہ موبائل سٹیشن عوامی ٹرانسپورٹیشن کے لیے استعمال ہونے والی گاڑیوں جن میں پبلک ٹرانسپورٹ بسیں اور دیگر وہیکلز کا معائنہ کرنے کی صلاحیت رکھتے ہیں۔

 موبائل سٹیشن کم آبادی والے علاقوں کے لوگوں تک پہنچنے اور دور دراز علاقوں کے سفر کی صلاحیت رکھتے ہیں جہاں لوگوں کو اعلی معیارکی خدمات فراہم کی جاتی ہیں۔

سطام الحزامی نے کہا کہ نئی سروس سے سعودی شہریوں اور مقیم غیرملکیوں اور کمپنیوں کو فائدہ ہوگا۔

علاوہ ازیں جنرل ڈائریکٹوریٹ آف پیریڈک ٹیکنیکل انسپیکشن آف کارز نے دیگر خدمات کے علاوہ صارفین کے استفسارات کے لیے کسٹمر سروس کال سینٹرکا بھی آغاز کیا ہے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں