موبائل چارجر پھٹنے سے گھر میں آگ لگ گئی، 7 افراد ہلاک

الاحسا میں موبائل چارجر پھٹنے سے گھر میں آگ لگ گئی جس کے باعث خاندان کے 7 افراد ہلاک ہوگئے ہیں۔

سبق ویب سائٹ کے مطابق خاندان کے افراد رات کو سوگئے جبکہ موبائل چارجر بجلی میں لگا ہوا تھا۔

گرم ہونے کی وجہ سے چارجر پھٹ گیا اور آگ لگ گئی جو دیکھتے ہی دیکھتے پورے گھر میں پھیل گئی۔

سربراہ خاندان  اور خاتون خانہ نے آگ بجھانے کی کوشش کی مگر دونوں زخمی ہوگئے جبکہ کمروں میں سوئے ہوئے بچے دھواں سونگھنے کی وجہ سے ہلاک ہوگئے۔

محکمہ شہری دفاع کو اطلاع ملی تو فوری طور پر متعدد ٹیمیں موقع پر پہنچ گئیں مگر اس وقت تک دم گھٹنے سے 7 افراد ہلاک ہوچکے تھے۔

محکمہ شہری دفاع نے کہا ہے کہ ’گھرمیں آگ لگنے کی صورت میں بجھانے میں مصروف ہونے کے بجائے افراد کو بچانے کی فکر کی جائے اورفوری طور پر گھر خالی کیا جائے‘۔

محکمے نے کہا ہے کہ ’آتشزدگی میں دھواں زہر کا کام کرتا ہے، بیشتر ہلاکتیں دھواں سونگھنے سے ہوتی ہیں‘۔