ایران کی فوجی صلاحیت میں ایک ہزار جدید ڈرونز کا اضافہ
ایران کی فوجی صلاحیت میں ایک ہزار جدید ڈرونز کا اضافہ
پیر 13 جنوری 2025 19:31
نئے ڈرونز میں 2000 کلومیٹر سے زیادہ رینج اور زبردست تباہ کن صلاحیت ہے۔ فائل فوٹو اے پی
امریکہ کے نئے آنے والے صدر ڈونلڈ ٹرمپ کے دور میں اسرائیل اور امریکہ کے ساتھ ممکنہ تنازعات کی تیاری کے سلسلے میں ایران کی فوجی صلاحیت میں ایک ہزار نئے ڈرونز کا اضافہ کیا گیا ہے۔
برطانوی نیوز ایجنسی روئٹرز کے مطابق ایران کے نیم سرکاری خبررساں ادارے تسنیم کی رپورٹ میں بتایا گیا ہے کہ دفاعی نظام کو مضبوط بنانے کے لیے ایرانی فوج کو پیر کے روز جدید ڈرونز فراہم کیے گئے ہیں۔
تسنیم نیوز ایجنسی کی رپورٹ میں بتایا گیا ہے یہ ڈرونز ایران کے مختلف مقامات پر فوج کے حوالے کیے گئے ہیں اور ان میں اعلیٰ اسٹیلتھ اور مضبوط قلعہ شکن صلاحیتیں موجود ہیں۔
نئے فراہم کئے گئے ڈرونز کی منفرد خصوصیات میں خودکار پرواز کے ساتھ 2000 کلومیٹر سے زیادہ کی رینج اور زبردست تباہ کن صلاحیت ہے۔
ڈرونز میں دفاعی شیلڈز سے گزرنے اور نچلی سطح کا ریڈار کراس سیکشن عبور کرنے کی اہلیت بھی ہے۔
نئے ڈرونز کی شمولیت ملکی سرحدوں کی بہتر نگرانی کے علاوہ دور دراز کے اہداف کے لیے ایرانی فضائیہ کے بیڑے کی جنگی صلاحیت بھی بڑھاتی ہے۔
ایران نے جنوری کے آغاز سے دو ماہ طویل فوجی مشقیں شروع کی ہیں۔ فوٹو اے ایف پی
ایران نے جنوری 2025 کے آغاز سے دو ماہ طویل فوجی مشقیں شروع کی ہیں جن میں نطنز کے مقام پر اہم جوہری تنصیبات پر میزائلوں اور ڈرونز کے فرضی حملوں کے خلاف سپاہ پاسداران انقلاب اور فوج کی دفاعی مشقیں شامل ہیں۔
