ووٹرز کی معلومات افشا ہونے کا انکشاف‘ نادرا سے کارروائی کا مطالبہ

اسلام آباد: الیکشن کمیشن نے ووٹرز کا ڈیٹا لیک ہونے کی شکایت کے بعد نادرا سے کہا ہے کہ وہ اس کے ذمہ داران کے خلاف کارروائی کرے۔ الیکشن کمیشن نے نادرا کو ایک خط کے ذریعے ووٹرز کی معلومات افشا کرنے والوں کے خلاف کارروائی کا مطالبہ کیا ہے۔ چیئرمین نادرا عثمان مبین پر الزام سامنے آیا ہے کہ انہوں نے مسلم لیگ ن کی انتخابات میں کامیابی کے لیے مدد کرتے ہوئے ووٹرز کا ڈیٹا فراہم کیا ہے۔ شکایت کے بعد الیکشن کمیشن نے نوٹس لیتے ہوئے چیئرمین نادرا کو خط میں ووٹرز کا ڈیٹا لیک ہونے پر تشویش کا اظہار کرتے ہوئے کہا ہے کہ نادرا حکام نے ووٹرز کی معلومات غیر متعلقہ افراد کو فراہم کرکے الیکشن کمیشن کے ساتھ کئے گئے معاہدے کی خلاف ورزی کی ہے اور ووٹرز کی معلومات الیکشن کمیشن کے پاس پہنچنے سے قبل ہی غیر متعلقہ افراد کے ہاتھوں میں پہنچ چکی ہے۔ الیکشن کمیشن کے مطابق معاہدے کے تحت نادرا ووٹرز کی معلومات کسی سے شیئر نہیں کر سکتا جس سے غیر مجاز افراد کے ہاتھوں تک پہنچنے کے خدشات ہیں۔ الیکشن کمیشن نے مطالبہ کیا کہ معلومات ظاہر کرنے والوں کے خلاف کارروائی کی جائے۔