ریاض سے ایک اور خصوصی پرواز، 304 پاکستانیوں کی واپسی

سعودی عرب سے خصوصی پروازوں کا سلسلہ جاری ہے۔ ریاض سے لاہور جانے والی  پاکستان انٹرنیشنل ائیرلائنز( پی آئی اے ) کی  ایک خصوصی پرواز سے 304 پاکستانیوں کی واپسی ہوئی ہے۔

ریاض میں پاکستان کے سفارتخانے سے جاری بیان کے مطابق خصوصی پرواز سےاٹھارہ میتیں بھی بھیجی گئی ہیں۔

 یاد رہے  کہ  جمعرات کو ریاض سے سیالکوٹ جانے والی پی آئی اے کی پرواز سے 140، دمام سے سیالکوٹ  جانے والی  پہلی پرواز سے 144 جبکہ لاہور جانے والی  دوسری پرواز سے 140 مسافر واپس گئے تھے۔

یکم مئی سے اب تک ریاض، جدہ، دمام اور مدینہ سے چلائی جانے والی 92 پروازوں کے ذریعے اٹھارہ ہزار سے زیادہ پاکستانی وطن واپس جا چکے ہیں۔

یاد رہے کہ رواں سال 16جون کے بعد سے خصوصی پروازوں کی ٹکٹیں براہ راست پی آئی اے اور اس کے مجاز ٹریول ایجنٹوں کے ذریعے فروخت کی جا رہی ہیں۔ اب ٹکٹ کے حصول کے لیے سفارت حانے یا قونصلیٹ آنے کی ضرورت نہیں ہے۔

 قونصلیٹ ذرائع کے مطابق جدہ اور مدینہ سے پی آئی اے کی 38 پروازوں کے ذریعے سات ہزار747 سے زیادہ پاکستانی سعودی عرب کے مغربی علاقے سے وطن واپس پہنچ چکے ہیں۔

ریاض اور دمام سے 54 خصوصی پروازوں کے ذریعے دس ہزار 720 پاکستانی وطن واپس جا چکے ہیں۔ 

 ریاض میں سفارت خانہ اور جدہ میں پاکستان قونصلیٹ پی آئی اے کے تعاون سے ان خصوصی پروازوں کے انتظامات دیکھ رہا ہے۔

سعودی عرب میں اس وقت ہزاروں پاکستانی وطن واپسی کے خواہش مند ہیں جن میں سے بیشتر وزٹ یا بزنس ویزے پر آئے تھے یا وہ سفری پابندیوں کے باعث واپس نہیں جا سکےتھے۔