’مسجد نبوی کا قدیم حصہ بدستور بند ہے،

مسجد نبوی میں امور عامہ کے ترجمان جمعان العسیری نے کہا ہے کہ مسجد کے قدیم حصے کو کھولنے اور 24 گھنٹے کے لیے روضہ مقدسہ کی زیارت کی اجازت کے حوالے سے جو خبریں وائرل ہو رہی ہیں وہ پرانی ہیں ۔ تاحال مجسد نبوی کے قدیم حصے اور روضہ مبارکہ کو عوام کے لیے کھولنے کا فیصلہ نہیں کیا گیا۔

ویب نیوز ’سبق‘ کے مطابق مسجد نبوی کے امور کے ترجمان نے کہا ہے کہ ’کورونا وائرس کی وجہ سے احتیاطی تدابیر پر عمل کرتے ہوئے تاحال مسجد نبوی الشریف کے قدیم حصہ کو کھولنے کا فیصلہ نہیں کیا گیا۔ نئی توسیع والے حصے نماز فجر سے ایک گھنٹہ قبل کھولے جاتے ہیں جو نماز عشا کے ایک گھنٹہ بعد بند کیے جاتے ہیں‘۔

العسیری  نے مزید کہا ’مسجد نبوی الشریف کے قدیم حصے میں محدود سطح پر نمازیوں کو آنے کی اجازت ہے جن میں مسجد میں کام کرنے والوں کے علاوہ جنازوں کے ساتھ آنے والے افراد شامل ہیں ‘۔

مسجد نبوی کے ترجمان جمعان العسیری  نے مزید کہا ’روضہ اقدس والا حصہ تاحال نہیں کھولا گیا ، ادارہ امور مسجد نبوی الشریف کی جانب سے  امور صحت اور امن عامہ کے اداروں کے تعاون سے مسجد نبوی میں آنے والوں کی صحت و سلامتی کویقینی بنانے کےلیے کارفرما ہے تاکہ وہ آرام و سکون سے مسجد نبوی الشریف میں عبادت کرسکیں ‘

انہو ں نے مزید کہا کہ ’درست خبریں مصدقہ ذرائع سے ہی حاصل کی جائیں غیر مصدقہ باتوں کو نہ پھیلایا جائے‘۔

واضح رہے سوشل میڈیا پر کہا جا رہا تھا کہ مسجد نبوی کے قدیم حصے کو جہاں روضہ اقدس ہے عام نمازیوں کےلیے کھول دیا گیا ہے۔