مسجد الحرام میں معذور زائرین کے لیے خصوصی خدمات

حرمین شریفین انتظامیہ نے مسجد الحرام میں معذور افراد کی سہولت کے لیے خصوصی انتظامات کر رکھے ہیں۔

سبق ویب سائٹ کے مطابق مسجد الحرام میں معذوروں کی تمام ضرورتوں کو مد نظر رکھتے ہوئے خدمات کی فراہمی کی جا رہی ہے۔

انتظامیہ نے بتایا ہے کہ ’مسجد الحرام کی پہلی منزل پر اجیاد پل کے سامنے معذور افراد کے لیے خصوصی مصلی تیار کیا گیا ہے، ’یہاں معذوروں کو تمام سہولتیں فراہم کی جارہی ہیں نیز ایس او پیز سمیت بنیادی صحت خدمات کی فراہمی کا بھی انتظام ہے۔‘

انتظامیہ کے مطابق وہیل چیئر کا استعمال کرنےو الے معمر اور معذور افراد کے لیے خصوصی گزرگاہوں کے علاوہ سماعت سے محروم افراد کے لیے اشاروں کی زبان میں رہنمائی کا انتظام کیا گیا ہے۔

اسی طرح بینائی سے محروم افراد کی آسانی کے لیے خصوصی گزرگاہیں اور راستے ہیں جہاں وہ زمین پر ثبت ابھرے ہوئے نشانات کی مدد سے خود چل سکتے ہیں۔

انتظامیہ کا کہنا ہے کہ ’عمرے کی ادائیگی کی غرض سے آنے والے معذور زائرین کو انتظامیہ کی طرف سے متعین اہلکار خصوصی خدمات مفت فراہم کرتے ہیں۔‘