کورونا کے نئے مریض مسلسل دوسرے دن بھی سو سے کم

سعودی عرب میں  پچھلے 24 گھنٹے کے دوران مسلسل دوسرے دن بھی کورونا کے سو سے کم نئے مریض سامنے آئے ہیں۔ 

متاثرین کی مجموعی تعداد بڑھ کر تین لاکھ 63 ہزار155 ہوگئی ہے۔

گذشتہ سال مارچ کے بعد یہ پہلی مرتبہ ہے کہ مملکت میں کورونا وائرس کے روزانہ کیسز 100 سے کم  رہ گئے ہیں۔ 

پیر کو وزارت صحت کی جانب سے جاری اعداد و شمار کے مطابق ’پچھلے چوبیس گھنٹے میں 166 مریض شفایاب ہوئے۔ صحت یاب ہونے والوں کی تعداد تین لاکھ 54 ہزار 609 ہو چکی ہے‘۔

بیان میں کہا گیا کہ ’چوبیس گھنٹے میں کورونا سے 10 ہلاکتیں ہوئی ہیں اب تک اس مہلک وائرس سے ہلاک ہونے والوں کی تعداد 6 ہزار 256 تک پہنچ گئی ہے‘۔

پیر 4 جنوری کو کورونا وائرس کے سب سے زیادہ مریض ریاض ریجن میں رہے جہاں 34 افراد میں وائرس کی تصدیق ہوئی جبکہ مکہ مکرمہ ریجن میں مریضوں کی تعداد 28 رہی ہے۔

مشرقی ریجن میں پندرہ، مدینہ منورہ ریجن میں چھ جبکہ الحدود الشمالیہ میں تین افراد میں کورونا ٹیسٹ مثبت آیا ہے۔

الجوف اورعسیر نجران میں دو، دو، تبوک، عسیر اور جازان ریجن میں مریضوں کی تعداد ایک، ایک رہی ہے۔

وزارت صحت کا کہنا ہے کہ مملکت میں کورونا وائرس کے ایکٹو کیسز کی تعداد 2 ہزار 290 رہ گئی جن میں سے 347 کی حالت نازک ہے۔

یاد رہے کہ وزارت صحت کی جانب سے کورونا ویکسین لگوانے کی مفت سہولت فراہم کی گئی ہے جس کےلیے وزارت کی صحتی ایپ پر رجسٹرکرانے کے بعد مقررہ دن ویکسین لگوائی جا سکتی ہے۔

کورونا ویکسینیشن سینٹر ریاض، جدہ اور الخبر میں قائم کیے گئے ہیں دیگر شہروں میں بھی سینٹرز قائم کیے جا رہے ہیں۔