کوئٹہ دھماکے میں ایک ہلاک، پولیس مقابلے میں پانچ’دہشت گرد‘ مارے گئے

کوئٹہ کے علاقے مشرقی بائی پاس پر دھماکہ ہوا ہے جس میں ایک ہلاک جبکہ تین افراد زخمی ہوئے ہیں۔ زخمیوں کو سول ہسپتال منتقل کردیا گیا ہے۔

کوئٹہ سے اردو نیوز کے نامہ نگار زین الدین احمد کے مطابق ’دھماکہ پیر کی رات تھانہ منظور شہید کی حدود میں مشرقی بائی پاس کے علاقے شیر جان سٹاپ میں ہوا۔‘

پولیس کا کہنا ہے کہ ’نامعلوم افراد نے دکان پر دستی بم پھینکا جس کے دھماکے سے چار افراد زخمی ہوگئے۔‘

تاہم سول ہسپتال کے میڈیکل سپرنٹنڈنٹ ڈاکٹر جاوید اختر نے بتایا کہ ’دھماکے میں ہلاک ہونے والے ایک شخص کی نعش اور چار زخمیوں کو سول ہسپتال لایا گیا ہے۔‘   

زخمیوں میں ایک پولیس اہلکار بھی شامل ہیں جن کی حالت تشویشناک بتائی جاتی ہے۔                                                                                                                                                                                                                       مزید پڑھیں

ایس ایچ او منظور شہید تھانہ ہدایت اللہ ترین کے مطابق ’جس دکان پر حملہ کیا گیا ہے وہ پولیس اہلکار کی تھی۔‘

’دکان میں یوم آزادی کی مناسبت سے پرچم اور بیجز وغیرہ فروخت کیے جارہے تھے۔‘ 

واضح رہے کہ کوئٹہ میں دو دنوں کے دوران یہ تیسرا دھماکہ ہے۔
علاوہ ازیں ترجمان سی ٹی ڈی نے ایک بیان میں دعوی کیا ہے کہ کوئٹہ کے نواحی علاقے نیوکاہان مری کیمپ میں کارروائی کے دوران فائرنگ کے تبادلے میں پانچ مبینہ دہشتگرد ہلاک ہوگئے۔
ترجمان سی ٹی ڈی کے مطابق مبینہ دہشتگردوں کے زیر استعمال کمپاونڈ سے اسلحہ وگولہ بارود برآمد ہو اہے۔ 
ترجمان کا کہنا ہے کہ مری کیمپ جانے والے علاقے کو فورسز نے گھیرے میں لے لیا۔ کارروائی میں فورسز کا کوئی جانی نقصان نہیں ہوا۔
بیان میں کہا گیا کہ مرنے والوں میں سے دو کی شناخت کالعدم تنظیم کے اہم رکن کے طور پر ہوئی ہے۔ تین افراد کی نعشوں کو شناخت کے لیے ہسپتال منتقل کیا جا رہا ہے۔