جرمنی: ٹرین میں چاقو بردار شخص کا حملہ، کئی افراد زخمی

جرمنی کی ریاست بائرن میں ایک تیز رفتار ٹرین میں چاقو کے حملے کے دوران کئی افرادزخمی ہوئے ہیں۔ پولیس کا کہنا ہے کہ مبینہ حملہ آور کو گرفتار کر لیا گیا ہے۔  

بائرن کے ضلع نوئے مارک کے شہر نوئے مارک اندر اوبرفالز میں پولیس نے ایک بیان میں کہا ہے کہ ’ابتدائی معلومات کے مطابق کئی لوگ زخمی ہوئے ہیں۔‘

خبر رساں ادارے اے ایف پی کے مطابق پولیس نے یقین دہانی کروائی ہے کہ ’اب مزید کوئی خطرہ نہیں ہے۔‘

جرمن اخبار ’دا بلڈ‘ میں بتایا گیا ہے کہ تین لوگ زخمی ہوئے تھے جن میں سے دو کے حالت تشویش ناک تھی۔

پولیس کی ایک ترجمان کا کہنا تھا کہ کسی کی جان خطرے میں نہیں تھی۔

پولیس نے مزید معلومات دیے بغیر بتایا کہ ایک شخص گرفتار کیا گیا ہے۔ 

ٹرین کو ملک کے جنوب میں نوئے مارک ضلع میں سوبرسڈورف کے سٹیشن پر روک لیا گیا تھا۔

اس واقعے کے بعد پولیس کی بھاری نفری کو جائے وقوعہ پر تعینات کیا گیا ہے۔