پاکستان کے وزیر اطلاعات عطا اللہ تارڑ میڈیا فورم میں شرکت کے لیے ریاض پہنچ گئے

پاکستان کے وزیر اطلاعات عطا اللہ تارڑ سعودی میڈیا فورم کے چوتھے ایڈیشن میں شرکت کے لیے ریاض پہنچ گئے ہیں۔
وزارت اطلاعات کے مطابق کنگ عبداللہ ایئرپورٹ پر سعودی عرب کے نائب وزیر برائے میڈیا ڈاکٹر عبدالرحمان نے عطا اللہ تارڑ کا استقبال کیا۔
سعودی عرب میں تین روزہ میڈیا فورم 19 سے 21 فروری تک دارالحکومت ریاض میں منعقد ہو رہی ہے۔

ریاض پہنچنے کے بعد گفتگو کرتے ہوئے وفاقی وزیر اطلاعات عطاءاللہ تارڑ نے کہا کہ ’سعودی عرب پاکستان کا قریبی دوست ملک ہے، دونوں ممالک کے درمیان تاریخی اور ثقافتی تعلقات قائم ہیں۔‘
’سعودی عرب کے فرمانروا شاہ سلمان بن عبدالعزیز اور ولی عہد شہزادہ محمد بن سلمان کا ترقی و خوش حالی کے لیے وژن مثالی ہے۔‘
ان کا کہنا تھا کہ ’معاشی ترقی اور کاروباری سرگرمیوں میں اضافے کے لیے سعودی حکومت کے اقدامات قابل تقلید ہیں، سعودی عرب امن، خوش حالی، استحکام اور بین المذاہب ہم آہنگی کا اہم وکیل ہے۔‘
وفاقی وزیر اطلاعات نے مزید کہا کہ ’سعودی میڈیا فورم سعودی عرب کے میڈیا سے متعلق تجربات سے استفادہ کرنے کا اہم پلیٹ فارم ہے۔‘
 وفاقی وزیر اطلاعات عطا اللہ تارڑ کانفرنس کے موقع پر اہم عالمی شخصیات سے ملاقاتیں بھی کریں گے۔
واضح رہے کہ سعودی میڈیا فورم میں دنیا بھر سے عالمی اور میڈیا سے تعلق رکھنے والی اہم شخصیات شرکت کر رہی ہیں۔فورم کا مقصد میڈیا کے شعبوں میں تعاون کو فروغ دینا اور جدید رجحانات پر تبادلہ خیال کرنا ہے۔
سعودی میڈیا فورم میں میڈیا پروڈکشن، ڈیجیٹل جرنلزم اور مواد سازی کے بارے میں تبادلہ خیال کیا جائے گا۔ ڈیجیٹل دور میں میڈیا، ڈیجیٹل ٹرانسفارمیشن اور مالیاتی استحکام کے لیے نئے بزنس ماڈلز کا جائزہ لیا جائے گا۔
اس کے علاوہ میڈیا فورم میں فیک نیوز، عوامی اعتماد کی بحالی میں میڈیا اداروں کے کردار کے بارے میں حکمت عملی پر بھی غور ہوگا۔
فورم میں آرٹیفیشل انٹیلی جنس، صحافت کا مستقبل، میڈیا اکنامکس، ڈیجیٹل نظام، مِس انفارمیشن، انٹرٹینمنٹ انڈسٹری اور ڈیجیٹل سٹریمنگ جیسے اہم موضوعات پر بھی مباحثے ہوں گے۔