صنعا اور صعدہ میں عسکری اہداف کو نشانہ بنایا ہے : اتحادی افواج

اتحادی افواج  کے ترجمان کرنل ترکی المالکی نے کہا ہے کہ صنعاء اور صعدہ میں مطلوبہ عسکری اہداف کو نشانہ بنایا گیا ہے۔

العربیہ کے مطابق بدھ کی شب اپنے بیان میں انہوں نے بتایا کہ ’ان اہداف میں بیلسٹک میزائلوں اور ڈرون طیاروں کے ٹھکانوں کے علاوہ ہتھیاروں کے ڈپو شامل ہیں‘۔

اتحادی افواج طیاروں نے الصیانہ و النہدین اور الحفا و عطان کے عسکری کیمپوں پر فضائی حملے کیے ہیں۔

 حملوں کے بعد یمنی دارالحکومت دھماکوں سے لرز اٹھا۔ اسی طرح صنعاء میں حزیز کے علاقے میں السواد اور سنحان کے علاقے میں  حوثیوں کے کیمپوں کو بھی نشانہ بنایا گیا۔

المشہد الیمنی ویب سائٹ کے مطابق عرب اتحاد کے طیاروں نے صنعاء میں حوثی ملیشیا کے سینئر رہنماؤں کے ایک اجلاس کی جگہ پر بھی بمباری کی۔

 یہ اجلاس صنعاء کے جنوب میں دار الرئاسہ میں ہو رہا تھا جہاں حوثی ملیشیا کے اہم رہنما ہلاک اور زخمی ہوئے۔

واضح رہے کہ گزشتہ روز اتحادی افواج کے حملے میں 60 حوثی ہلاک ہوئے تھے جبکہ 8 فوجی گاڑیاں تباہ ہوگئی تھیں۔